A axencia espacial estadounidense NASA ofrece ao público a oportunidade de engadir o teu nome e apelido a un microprocesador que o seu robot Mars 2020 levará a Marte “nun paso inicial da primeira viaxe da humanidade a outro planeta”.
Mars 2020, un trebello que pesa unha tonelada, será lanzado a comezos de xullo e espérase que descenda en febreiro de 2021 sobre o planeta vermello , onde buscará sinais de vida microbiana, estudará o clima e a xeoloxía e recollerá mostras que algún día serán traídas á Terra.
Publicidade
A NASA ofrece un boleto de viaxe simbólico a quen desexe enviar o seu nome nun microprocesador ata o planeta a uns 54,6 millóns de quilómetros da Terra.
Esta “pasaxe” a Marte pode obterse na páxina web da NASA e ata este mércores tiña 721.767 nomes.
Os participantes que abran unha conta recibirán un “boleto” e puntos como “viaxeiros frecuentes”. A NASA indicou que máis dous millóns de nomes xa foron na misión InSight que aterrou en Marte en novembro pasado, e cada participante recibiu puntos por case 500 millóns de quilómetros de “voo”.
O boleto a Marte que levará o teu nome.
O Laboratorio de Microdispositivos, no Laboratorio de Propulsión da NASA en Pasadena, California , gravará cun feixe de electróns os nomes nun microprocesador de silicona con textos máis pequenos que unha milésima do grosor dun cabelo humano. Para ser precisos, indicou a axencia, iso equivale a 75 nanometros . “Con ese tamaño poden escribirse máis dun millón de nomes nun só procesador do tamaño dunha moeda de 10 centavos de dólar”, engadiu o anuncio da NASA. “O microprocesador irá co robot baixo unha cuberta de vidro”.
Pasaron máis de seis décadas desde que o primeiro artefacto humano completou unha órbita arredor da Terra, e a NASA realiza esforzos permanentes para manter o interese do público na exploración espacial. Desde que o artefacto Mars Polar Lander foi lanzado en xaneiro de 1999, a NASA expandiu a súa exploración do planeta nunha campaña de preparación para o envío de humanos ao planeta vermello.