Algunha vez miraches o ceo nocturno e viches unha estela brillante cruzando o ceo? Non é ningún fenómeno fóra do normal. De feito, nin sequera ten nada que ver coa natureza. Iso que chama a túa atención son satélites que orbitan por enriba da túa cabeza a miles de quilómetros de distancia. Son realmente útiles na nosa vida cotiá e teñen múltiples aplicacións científicas. Unha das máis salientables é o seu papel clave durante os desastres naturais, cando se alzan como alternativa ás comunicacións terrestres, que colapsan. Para afondar en todas as estas cuestións e entender realmente que son e como funcionan este tipo de conexións falamos co investigador Fernando Aguado Agelet.
Neste episodio Comunicacións vía satélite: que son e como funcionan do pódcast de GCiencia en colaboración co Centro de Investigación en Tecnoloxías de Telecomunicación (atlanTTic) da Universidade de Vigo analizamos en profundidade este concepto. Trataremos as vantaxes e inconvenientes das comunicacións vía satélite, onde abordaremos o seu elevado custo e as empresas privadas, como Starlink de Elon Musk, que fan uso desta tecnoloxía. Tamén trataremos de entender como se regulan este tipo de comunicacións e como se controla o lixo espacial que xeran, producindo un evidente obstáculo á observación astronómica. Todo isto, e moito máis, no pódcast de GCiencia e atlanTTic.
Episodio realizado por Laura Filloy
Edición: Carlos Tresandí
Escóitao nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
