É un dos eventos astronómicos máis esperados do ano. Unha eclipse de Lúa agasallaranos un fermoso ceo esta fin de semana. Será a noite do sábado 28 de outubro cando se deixará ver dende toda España. A eclipse de Lúa é un fenómeno que se orixina cando a Terra, a Lúa e o Sol se alinean e proxectan a sombra da Terra sobre a Lúa, provocando un bloqueo da luz solar e escurecendo parcialmente ou totalmente ao satélite. Neste caso, a eclipse será parcial. Segunda indica starwalk.space, esta vai ser a eclipse lunar máis grande ata 2025.
Estes fenómenos poden observarse sen grandes complicacións, a simple vista. Non resulta perigoso para os ollos e non fai falta ningún aparello. O único inconveniente pode ser a meteoroloxía. En Galicia todo apunta a que os ceos estarán cubertos pola influencia dunha borrasca, o que dificultará a súa contemplación xa que a Lúa poderá estar tapada polas nubes. A eclipse será visible a partir das 19:00 horas do sábado, preferente nun lugar alto, aberto e escuro, lexos da contaminación lumínica para velo en toda a súa expresión.
O mellor momento para ver a eclipse dende Galicia será entre as 21:30 e as 22:52 horas
A eclipse prodúcese coa Lúa chea. Como todas, este fenómeno recibe unha denominación distinta dependendo da tradición e da rexión xeográfica. Neste caso, no Hemisferio Norte chámase “Lúa do cazador” porque a luz da lúa permitíalles rastrexar aos cazadores as presas na escuridade. Noutros lugares recibe tamén o nome de Lúa migratoria, Lúa de xeo, Lúa de sangue, Lúa de caída das follas, Lúa da herba moribunda ou Lúa de sementes.
O Observatorio Astronómico Ramón María Aller apunta que o mellor momento para ver a eclipse parcial dende Galicia será entre as 21:30 e as 22:52 horas. O evento acadará a súa magnitude ás 22:14 horas.
A Lúa do cazador non será o último evento astronómico de 2023. Do 4 ao 20 de decembro poderán contemplarse as xemínidas, a chuvia de estrelas máis forte. É un fenómeno que ocorre cada ano e está provocado polo asteroide Faetón.
