Os datos do último informe do INE sobre o uso das TIC, correspondente ao ano 2021, indican que Galicia está a reducir a fenda dixital que existe coa media estatal en canto ao uso e equipamento das novas tecnoloxías. A evolución foi especialmente satisfactoria no tramo de idade entre 65 e 74 anos, xa que rexistrouse un incremento do uso de internet dun 21% fronte ao 5,2 % de aumento estatal respecto ao 2020.
Este dato permite reducir a fenda en preto de oito puntos nesta franxa xa que agora a media estatal de uso de internet neste apartado da poboación sitúase no 73,3% mentres que en Galicia acada o 65%, logo do espectacular incremento deste ano. É moi posible que os efectos da pandemia teñan moito que ver nestes datos pero o feito é que Galicia tivo un incremento moi superior ao do conxunto do Estado.
Segundo os datos do informe do INE sobre o equipamento e uso das TIC nos fogares en 2021, o 90,2% dos galegos usa internet, rexistrando a menor diferencia coa media estatal (93,9%) do rexistro histórico. Por idades o 100% dos galegos de 16 a 34 anos empregan internet, por riba da media estatal, mentres que as porcentaxes redúcense ao 96,7% no tramo de 35 a 44 anos, ao 95,8 entre 45 e 54 anos, ao 86,8 entre 55 e 64 e ao xa citado 65% entre os 65 e os 74 anos.
Ademais, segundo a análise realizada polo Observatorio da Sociedade da Información e a Modernización de Galicia (OSIMGA), dependente da Axencia para a Modernización Tecnolóxica de Galicia (Amtega), máis do 93% dos fogares galegos teñen servizo de internet contratado, unha porcentaxe que se mantén en todos os concellos de máis de 10.000 habitantes e que nos concellos de máis de 100.000 xa supera o 95%. O crecemento máis destacado prodúcese nos municipios con menos de 10.000 habitantes que, por primeira vez, superan a barreira do 90% de fogares con internet contratado
Respecto ao equipamento, o 78,7% dos fogares galegos contan con algún tipo de ordenador, experimentando un crecemento do 9,2% no último ano fronte ao incremento do 2,8% da media estatal. Ademais,
Medra o comercio electrónico
O 52,5% da poboación galega mercou a través de internet nos últimos tres meses, un crecemento do 11,2% respecto ao ano anterior fronte ao crecemento do 2,6% que experimenta a media estatal. Este pulo do comercio electrónico localízase especialmente nas persoas de máis idade, xa que crece un 43,2% no tramos de 55 a 64 anos e case se triplica no de 65 a 74 anos. Os datos do INE constatan que as compras a través de Internet acadan o seu valor máis elevado entre as persoas de 35 a 44 anos cun 73,7%.
Con respecto aos indicadores de administración electrónica, un 70,7% dos internautas galegos comunicáronse coas administracións a través de Internet, experimentando un crecemento do 7,6% no último ano. Cabe salientar que un 56,8% son usuarios avanzados no ámbito da administración dixital e envían formularios cumprimentados a través de Internet.
Datos de Tele Escola
Tele Escola é un módulo novo incorporado polo INE nesta edición. Este concepto refírese á asistencia a clase ou realización doutro tipo de actividades docentes, a través de internet (de forma total ou parcial), impartidas por parte dos profesores habituais do seu centro educativo e referidas ao curso académico (neste caso 2020/2021) mediante o uso de medios e sistemas informáticos, telemáticos e de telecomunicación desde un lugar diferente á escola.
O 92,6% dos nenos/as galegos de 6 a 15 anos conviven en fogares que dispoñen dos medios ou recursos suficientes (internet, equipamento informático,…) que farían posible a asistencia a clases ou actividades de Tele Escola.
O 44,8% dos nenos/as galegos de 6 a 15 realizaron ou asistiron a clases ou actividades en liña de forma total ou parcial no tres últimos meses. Pola súa banda, o 46,9% non asistiu a estas clases aínda tendo recursos no fogar, xa que non eran obrigatorias ou non se impartían no seu curso académico 20/21.
