Únete á nosa canle de Whatsapp
A formación dixital xa é un imprescindible no mercado laboral. Por iso a Axencia para a Modernización Tecnolóxica de Galicia (Amtega) impulsa unha nova edición de DigiTalent. Un programa que ten como obxectivo reducir a fenda entre a dispoñibilidade de traballadores con competencias dixitais e a crecente demanda destes perfís. Os seus eixos de actuación son fundamentalmente tres: o impulso ás vocacións STEM, a promoción de adaptación aos novos perfís dixitais e a formación e-líderes para a transformación dixital.
Ser tecnólogo por un día
Dentro do novo catálogo de actividades de DigiTalent está o lanzamento do programa “Tecnólog@s por un día”. Unha iniciativa que buscar espertar interese polos estudos STEM entre as persoas máis novas. Este proxecto, que abrirá pronto o seu prazo de inscrición, ofrece a rapaces de ata 17 anos a oportunidade de desfrutar dunha xornada de inmesión en proxectos reais da man dos responsables de talento e profesionais sénior das empresas colaboradoras.
Como novidade, coa volta á presencialidade desta iniciativa, os nenos e nenas participantes que realicen a súa visita en Amtega, terán a posibilidade de coñecer as instalacións como o GaiásTech, onde realizarán actividades lúdico-formativas na sala inmersiva con imaxes 360º e lentes de realidade virtual.
Ciclo de webinars
Outra das apostas do DigiTalent deste ano será o ciclo de webinars TransformaTech Sessions, que afondará en temáticas relativas á Industria 4.0 e tecnoloxías disruptivas ligadas ao big data, á ciberseguridade ou á intelixencia artificial. Estas xornadas van dirixidas a todo tipo de profesionais que desexen especializarse nestes ámbitos. Ademais, os participantes contarán cun servizo de titorías online.
Amais dos webinars, Amtega tamén propón o Programa de Mentoring FP, no que o alumnado deste nivel educativo do ámbito STEM poderá contar coa colaboración dunha rede de mentores que resolverán as súas inquedanzas laborais, orientarán as súas iniciativas emprendedoras e acompañaranos na identificación de saídas profesionais no ámbito tecnolóxico a través de sesións personalizadas.
Retorno do talento dixital galego
Amtega, coa colaboración da Secretaría Xeral de Emigración, acaba de lanzar o Portal Retorna Dixital; unha iniciativa dirixida aos galegos e galegas do sector TIC que se encontran no exterior e desexan volver á terra. Así, ofrécenselle unha serie de oportunidades para comezar unha nova carreira profesional.
O Portal, activado no mes de setembro ao abeiro do Plan DigiTalent e enmarcado na web GaliciaAberta, é un espazo que facilita o encontro entre as empresas do sector TIC galego adheridas que buscan profesionais especializados e o talento dixital emigrado de Galicia. Ademais, o Portal dispón dun directorio de empresas que os profesionais interesados poderán consultar para contactar directamente.
DigiTalent foi concibido coma un Plan vivo e conectado coa realidade galega para a
xeración e retención de talento, unha iniciativa aberta á reflexión conxunta entre a
Administración galega e os axentes do ecosistema dixital. Neste compromiso compartido, a estas actuacións sumaranse, un ano máis, as iniciativas lideradas polas 12 empresas adheridas ao Pacto Dixital de Galicia, que colaboran con Amtega para impulsar unha serie de eixos estratéxicos e promover entre a cidadanía as capacidades necesarias para desenvolverse plenamente no eido dixital.
