O grupo biotecnolóxico Zendal, con base na localidade galega do Porriño, acaba de dar un novo e relevante paso na carreira global á procura da vacina da Covid-19. Despois de anunciar no mes de setembro que a filial Biofabri producirá o antíxeno da vacina impulsada pola compañía Novavax, informou este mércores da sinatura dun acordo coa CEPI (Coalición para a Promoción de Innovacións para a Preparación ante Epidemias), co que se suma a esta alianza mundial que persegue producir 2.000 millóns de doses de vacinas seguras e efectivas para finais de 2021. A distribución global farase a través do Fondo COVAX, unha iniciativa internacional que ten como obxectivo garantir un acceso equitativo ás vacinas contra o novo coronavirus para todos os países participantes.
Zendal, primeira e única compañía seleccionada na Unión Europea pola CEPI, reservará mediante este acordo unha parte da súa capacidade para a fabricación de doses da vacina. Dentro desta alianza, e a través de Biofabri, o grupo reservará a capacidade de fabricación (fase de enchido e acabado) das vacinas contra a Covid-19 que designe a CEPI ata maio de 2022. Estímase que a capacidade podería superar os 500 millóns de doses de vacina, coa opción de ampliar esta reserva.
A compañía expuxo nun comunicado que este é o “segundo gran paso” na loita contra o SARS-CoV-2, despois do acordo con Novavax, que converte a Zendal na primeira compañía española autorizada para a fabricación dunha inmunización fronte á pandemia.
Biofabri fabricará no Porriño o antíxeno dunha das vacinas contra a Covid-19
Andrés Fernández, CEO de Zendal, destaca que “este acordo recentemente asinado coa coalición liderada por CEPI, de importancia clave nestes momentos, pon de relevo que somos moitos os actores implicados e necesarios na loita contra a pandemia” e, neste sentido, “reforza a posición de Zendal como grupo biotecnolóxico preparado e con capacidade para desenvolver o proceso integral de produción dunha vacina, desde a súa propia fabricación, ata o envasado e acondicionamento para a súa posta final no mercado”. Os proxectos supoñen, segundo Fernández, “un respaldo ao traballo realizado polo noso equipo durante moitos anos no campo de biotecnoloxía e as vacinas”.
CEPI
A CEPI é unha asociación de organizacións públicas, privadas, filantrópicas e civís, lanzada en Davos en 2017 co fin de desenvolver vacinas para deter futuras epidemias. A CEPI traballa en coordinación coa Organización Mundial da Saúde (OMS) para atopar unha resposta á pandemia do coronavirus. Antes da aparición da Covid-19, as enfermidades prioritarias do CEPI incluían as causadas polo virus do ébola, o virus de Lassa, o MERS-CoV, o virus de Nipah, a febre do Valle do Rift e o virus chikungunya.
Esta alianza público-privada conta con financiamento e/ou apoio de distintos países a nivel mundial como Xapón, aos que este ano se sumou a achega de España con 75 millóns; de organismos internacionais como a OMS ou UNICEF e a Fundación Bill e Melinda Gates.
COVAX
COVAX, Acelerador do acceso ás ferramentas contra a Covid-19, é unha alianza creada en 2020 para establecer os mecanismos necesarios para acelerar a procura da vacina. Está codirixido pola CEPI, a Alianza para as Vacinas e a Organización Mundial da Saúde (OMS), en colaboración con fabricantes de vacinas de países desenvolvidos e en desenvolvemento. É a única iniciativa mundial que traballa cos gobernos (actualmente 182 en todo o planeta) e os principais fabricantes para garantir que as vacinas contra a COVID 19 estean dispoñibles en todo o mundo tanto para os países de ingresos máis altos como para os de menores ingresos.
O grupo Zendal acolle sete empresas enfocadas á investigación, o desenvolvemento, a fabricación e a comercialización de vacinas de saúde humana e animal e outros produtos de alto valor engadido para o ámbito da biotecnoloxía. As firmas que se atopan baixo o seu paraugas son CZ Vaccines, Biofabri, Probisearch, Vetia, Petia, Zinereo e Bialactis. Conta cun equipo formado por máis de 300 persoas, na súa maioría de alta cualificación.
