A compañía farmacéutica Biofabri, con sede no Porriño e parte do grupo Zendal, vén de anunciar resultados preliminares prometedores cunha nova terapia inmunolóxica contra o cancro de vexiga baseada na bacteria empregada na vacina contra a tuberculose. O ensaio clínico ENCORE-01 realizouse en 15 centros de España para avaliar a seguridade e eficacia do tratamento en pacientes de entre 18 e 85 anos cun tipo de cancro de vexiga agresivo. O estudo, que se realizou en colaboración coa Fundación para a Investigación en Uroloxía (FIU), consistiu na administración da terapia seis veces á semana, xunto a un mantemento de tres instilacións aos tres, seis e 12 meses.
Efectos secundarios e calidade de vida
A terapia ensaiada por Biofabri baséase na cepa BCG Moreau RJ e os resultados do estudo indican que a súa aplicación mellora a progresión a 12 e 14 meses, e que a taxa de recidiva a 12 e 24 meses non é superior á observada noutros grupos. De feito, en moitos casos é inferior á previamente publicada. En canto aos efectos secundarios do tratamento, non se atoparon diferenzas relevantes en frecuencia ou gravidade en relación a outras terapias, e incluso se detectou unha tendencia á baixa. “A calidade de vida mantívose estable durante o tratamento e seguimento”, sinalan dende Biofabri.
Dende a compañía biofarmacéutica sinalan que esta cepa presentou “alta eficacia” no ensaio e demostrou ser “segura e ben tolerada”, o que favoreceu a adherencia ao tratamento. De feito, esperan iniciar os pasos para a solicitude de rexistro deste candidato antes do final de ano.
O ensaio clínco, desenvolvido en 15 centros de varias comunidades autónomas, arrincou co seu primeiro paciente en maio de 2019. A cepa empregada foi desenvolvida por Biofabri para este estudo, e a súa utilización basesouse na “ampla experiencia” de tratamentos deste tipo contra o cancro de vexiga en Brasil, onde xa se leva empregando esta BCG Moreau RJ máis de 20 anos.
