O acordo con Novavax sitúa a Zendal como a primeira empresa española en entrar no proceso de fabricación de vacinas contra o coronavirus. Foto: Zendal.
O acordo con Novavax sitúa a Zendal como a primeira empresa española en entrar no proceso de fabricación de vacinas contra o coronavirus. Foto: Zendal.

Biofabri fabricará no Porriño o antíxeno dunha das vacinas contra a Covid-19

O grupo Zendal anunciou un acordo coa compañía estadounidense Novavax, que actualmente se atopa na fase II dos ensaios clínicos

A empresa Biofabri, filial do grupo biofarmacéutico Zendal, con sede no Porriño, converterase na primeira compañía española en formar parte do proceso de fabricación dunha vacina contra a Covid-19. Segundo anunciou este martes Zendal, acadou un acordo coa compañía Novavax para a produción industrial do antíxeno que utilizará na vacina contra a Covid-19, que actualmente se atopa na fase II de ensaios clínicos, o que a sitúa como unha das 12 máis avanzadas no planeta, segundo a OMS.

O contrato expón que Biofabri será a encargada para a Unión Europea da produción da vacina deseñada pola farmacéutica con sede en Gaithersburg, ao noroeste de Washington. Estímase que, unha vez completada a actual etapa, Novavax inicie a fase III no último treito de 2020.

O acordo supón “un importante reto” para Zendal, en palabras da propia empresa galega, “xa que se pon á cabeza das compañías biotecnolóxicas ao ser a única española ata o momento en entrar no proceso de fabricación dunha das vacinas nas que se traballa para previr o SARS-Cov-2, e facelo ademais a nivel europeo”. Andrés Fernández, CEO do grupo Zendal, engade que “este acordo é a ratificación do noso esforzo permanente pola innovación e a nosa aposta pola excelencia en biotecnoloxía. Tamén desde Zendal queremos destacar o apoio mostrado polo Ministerio de Sanidade e a Axencia Española do Medicamento durante todo este proceso”.

Actualmente, outra das filiais do grupo, CZ Vaccines, mantén abertas liñas de traballo relacionadas co SARS-COV-2. E no caso de Biofabri tamén se está explorando a posibilidade de que a MTVBAC, unha vacina contra a tuberculose impulsada xunto á Universidade de Zaragoza, teña capacidade de facer fronte ao novo coronavirus. A MTVBAC é outro dos proxectos relevantes impulsados desde O Porriño, e comezará a fase III dos ensaios clínicos a principios do 2021.

O grupo Zendal é un grupo biofarmaceútico formado actualmente por 6 empresas, todas enmarcadas no sector da biotecnoloxía e vacúas para saúde humana e animal: CZ Vaccines, Biofabri, Vetia, Petia Animal Health, Zinereo Pharma e Probisearch.

A vacina de Novavax

A candidata da empresa estadounidense, de nome NVX-CoV2373, está deseñada a partir da secuencia do propio coronavirus SARS-CoV-2, e usa unha tecnoloxía de nanopartículas recombinantes para xerar os antíxenos derivados da proteina S (spike ou espícula) do virus. Contén un adxuvante patentando pola propia empresa que estimula a resposta inmune do organismo e o desenvolvemento de anticorpos neutralizantes. Nos ensaios preclínicos, demostrou unha boa resposta de tolerancia e de xeración de anticorpos, superiores ás observadas no plasma de convalecentes humanos.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.