Manuel José Vázquez Lima, membro da Comisión de xestión da crise sanitaria, no vídeo difundido esta tarde pola Xunta no que se cuestionaba a utilidade clínica dos tests rápidos enviados polo Ministerio. Fonte: xunta.gal.
Manuel José Vázquez Lima, membro da Comisión de xestión da crise sanitaria, no vídeo difundido esta tarde pola Xunta no que se cuestionaba a utilidade clínica dos tests rápidos enviados polo Ministerio. Fonte: xunta.gal.

A Xunta abre a polémica cos test rápidos de Sanidad: “Non teñen utilidade clínica”

A Delegación do Goberno sostén que o tipo de probas remitidas a Galicia foi elixido "en consenso coas comunidades autónomas" entre máis de 70 modelos

Un día despois de que Galicia recibira 57.760 probas rápidas para detectar anticorpos fronte ao SARS-CoV-2, enviadas polo Ministerio de Sanidad, o Goberno da Xunta abriu a polémica este martes ao cuestionar a “utilidade clínica” destes tests a través dunha información difundida no seu web e as súas redes sociais. A través dun dos profesionais sanitarios que forma parte da Comisión de Xestión da crise sanitaria causada polo coronavirus, Manuel José Vázquez Lima, o ente autonómico advirte da “eiva detectada” por esta comisión, e expón que os tests rápidos por Sanidad “non son útiles desde o punto de vista clínico para poder facer un peneirado en residencias e profesionais sanitarios”. Porén, nunha nota de prensa difundida na tarde do martes, a Delegación do Goberno en Galicia explica que os mencionados tests, seleccionados entre máis de 70 modelos distintos, foron elixidos “en consenso coas comunidades autónomas”.

O pasado domingo 5, unha nota de prensa do Ministerio xa adiantaba que o uso de devanditos modelos foi decidido “tras valorar as informacións e estudos do Instituto de Salud Carlos III e acordouse coas comunidades autónomas na ponencia de alertas”. Ante este escenario, GCiencia preguntou ao Sergas se a Comisión de xestión da crise, e por extensión a Xunta de Galicia, non coñecía as características deste modelo de tests antes de recibilos, e desde cando coñecía as características de devanditas probas, pero non obtivo resposta ata o momento.

“O problema é que estes tests o que detectan é a nosa resposta inmune fronte á infección, se producimos anticorpos ou non. Estes anticorpos poden producirse na fase primeira da enfermidade, ou na fase final, cando xa vas curar”, expón Vázquez Lima, que é coordinador de Urxencias no Hospital do Salnés de Vilagarcía de Arousa e vicepresidente da Sociedad Española de Medicina de Urgencias y Emergencias (SEMES), no vídeo compartido pola Xunta e o propio presidente Alberto Núñez Feijoo. O domingo, o mandatario xa avanzara que as probas que ía remitir o Goberno español eran “tests de apoio“, que “valen para confirmar positivos pero non para descartar os negativos, e destinaranse a estender as probas en residencias de maiores e persoal sanitario”. Engadía Feijoo que “nos van axudar a dar positivos de maneira máis rápida”.

Existen uns tests, os que nós pediamos, e que a Consellería (de Sanidade) creo que tiña, que permiten definir claramente se estás na fase aguda da enfermidade, cando eres contaxioso, ou na fase final da enfermidade, cando xa estás a curar. Os tests que nos enviaron non distinguen entre uns anticorpos e os outros, só fan unha medición global dos anticorpos, co cal, cun positivo neste test, eu non podo saber, como clínico, se ti estás na fase aguda da enfermidade e eres contaxioso, ou se estás curando ou curaches xa”.

Ante esta “eiva” que expón a Xunta, Vázquez Lima apuntou a que se está avaliando a posibilidade de destinar estes test á realización dun estudo epidemiolóxico para obter información sobre a exposición da poboación ao virus.

Como son estas probas rápidas?

A Guía para a utilización destas probas (ver PDF) que é pública no portal web do Ministerio de Sanidad, e difundida tamén ás comunidades autónomas, explica en detalle o funcionamento destes tests. E aclara o punto sobre o que a Xunta verteu este martes as dúbidas respecto á súa idoneidade. “Este test serolóxico non distingue entre (anticorpos) IgM e IgG e só mide a aparición de AC (anticorpos) totais”, di a guía, do mesmo xeito que expón Manuel José Vázquez Lima na mensaxe difundida pola Xunta de Galicia.

Cada un destes anticorpos aparece nunha fase da infección. Os IgG, por exemplo, poden seguir estando presentes cando o paciente superou a fase aguda da Covid-19. Por tanto, aínda que non revela, por dicilo dalgún xeito, a fase da enfermidade na que está o paciente, si revela que estuvo exposto ao virus e desenvolveu anticorpos e, por tanto, inmunidade. Por tanto, en caso de ser negativa, segundo expón o Ministerio, “só obriga a realizar a proba PCR nos resultados negativos para comprobar a presenza do virus”.

En canto ás razóns da escolla destas probas, que se fan tomando unha mostraxe de sangue, a Delegación do Goberno en Galicia explica nunha nota de prensa que o modelo foi elixido “en consenso coas comunidades autónomas”, o que choca coa versión difundida pola Xunta a través dos membros do comité. A decisión de optar por estes tests tomouse “porque o consideran un bo complemento para as PCR en contornas cunha prevalencia da enfermidade alta, como hospitais e residencias de maiores”. Ademais, outro dos criterios é “a sensibilidade, pois teñen un 80% a partir dos sete días de infección e superior ao 64% en todos os casos“.

Información de Sanidad

Neste sentido, o Ministerio de Sanidad explicaba este martes nunha nota de prensa que estas probas rápidas están pensadas para facerse “fundamentalmente no ámbito hospitalario e en residencias de maiores e centros socio-sanitarios”. No primeiro caso, aclaran, “o test rápido está indicado en pacientes con alta sospeita clínica, aos que non se lles realizou PCR ou con PCR negativa con varios días de evolución”. Deste xeito, detectando a presenza de anticorpos, pode constatarse a infección de colectivos como os traballadores sanitarios e, deste xeito, cesar a súa actividade para previr novos contaxios a persoas coas que estean en contacto e, desta forma, non será necesario acudir á proba PCR.

Con este envío masivo de probas ás comunidades autónomas, Sanidad busca “reducir a sobrecarga das probas PCR, que tardan unhas 3 horas, requiren de persoal adestrado e preparado e chegan a entre 15.000 e 20.000 ao día en España”. “Cos test de diagnóstico rápido, só será necesario recorrer ás PCR nos casos negativos”.

Respecto a as residencias de maiores e centros socio-sanitarios o obxectivo é detectar precozmente os casos e investigar os posibles brotes. Por tanto, o seu uso está indicado en pacientes sintomáticos se transcorreron varios días desde o inicio de síntomas.  Nestes casos, un dos puntos de maior risco pola vulnerabilidade das persoas de maior idade fronte a doenza, “se na institución detectouse máis dun caso con síntomas non será necesario obter un resultado positivo de todos para considerar que existe un foco”, sen recorrer tampouco á PCR.

Estas probas serolóxicas, engade o Ministerio, “resultan de especial utilidade para incrementar de maneira substancial a capacidade de diagnóstico”, confirmando ou descartando a presenza da Covid-19 na poboación. “Cando o resultado sexa positivo, pódese establecer o diagnóstico”, e “cando o resultado sexa negativo, en cambio, confirmarase cunha PCR para estar seguros do resultado”, aclaran.


Máis información:

Así funcionan os tests rápidos para detectar o coronavirus

Así son as probas actuais para detectar o SARS-Cov-2

 

 

 

 

 

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.