A doutora Nieves Martínez Lago, do Servizo de Oncoloxía Médica do Complexo Hospitalario Universitario de Santiago de Compostela (CHUS) e investigadora do Instituto de Investigación Sanitaria de Santiago de Compostela (IDIS), foi recoñecida nos Premios DISCOVERGI por un traballo do estudo BeTAS centrado en pacientes con cancro colorrectal metastásico.
O proxecto analiza, en condicións de práctica clínica real, a experiencia cun tratamento combinado —trifluridina/tipiracil máis bevacizumab (FTD/TPI+BEV)— utilizado en pacientes con esta patoloxía que xa recibiran varias liñas terapéuticas. Participaron no estudo un total de 593 pacientes tratados en 19 hospitais españois, o que permitiu coñecer mellor os que poden obter un beneficio especialmente prolongado con esta estratexia.
Aproximadamente un de cada cinco pacientes permaneceu polo menos nove meses sen progresión da enfermidade, con resultados de supervivencia moi favorables dentro deste contexto clínico. Estes datos achegan información relevante para comprender mellor a resposta ao tratamento e avanzar cara a unha atención cada vez máis individualizada. “Este traballo pon tamén de manifesto o valor dos estudos de práctica clínica real, que permiten complementar a información procedente dos ensaios clínicos e coñecer como funcionan os tratamentos en pacientes atendidos na práctica asistencial habitual”, explica a Dra. Nieves Martínez.
Un grupo de investigación de referencia
A investigadora do grupo Oncomet do IDIS recolleu o galardón o pasado xoves 10 de setembro en Madrid, durante a final dos Premios DISCOVERGI, unha iniciativa científica da Fundación ECO (Fundación para a Excelencia e a Calidade da Oncoloxía), coa colaboración de Servier. O proxecto foi seleccionado entre os traballos finalistas no ámbito dos tumores dixestivos. Para a Dra. Martínez Lago, este premio supón un recoñecemento ao carácter colaborativo do estudo: “Detrás deste traballo hai moitas horas de esforzo, colaboración entre centros e, sobre todo, un gran equipo de investigadores. Este recoñecemento é de todos os profesionais e centros que fixeron posible o estudo BeTAS”. Un paso máis na traxectoria de Oncomet, que se consolida como un dos grupos de investigación oncolóxica de referencia no ámbito galego, estatal e internacional.
Referencia: Long-term responders to trifluridine/tipiracil plus bevacizumab in previously treated metastatic colorectal cancer: Results from the BeTAS real-world study (Publicado en Journal of Clinical Oncology)
