Un equipo internacional de Investigadores, dirixidos dende o grupo Metabolic Homeostasis and Vascular Calcification do Instituto de Investigación Sanitaria de Santiago de Compostela (IDIS), publicou un estudo que achega novas claves para comprender o crecemento temperán do aneurisma de aorta abdominal, unha enfermidade cardiovascular grave e potencialmente mortal.
O aneurisma de aorta abdominal consiste nunha dilatación anormal da arteria principal do corpo e adoita evolucionar de forma silenciosa. A súa rotura ten unha elevada mortalidade, polo que mellorar a capacidade para predicir a súa evolución é un dos grandes retos da medicina cardiovascular. Na actualidade, a cirurxía é o único tratamento capaz de previr a rotura do aneurisma, pero só se indica cando a dilatación acada un tamaño elevado. Para os aneurismas pequenos, o control e seguimento periódico é a única opción clínica.
O estudo do IDIS analiza mostras de sangue de pacientes europeos e demostra que a actividade da fosfatasa alcalina circulante e a degradación do pirofosfato, unha molécula que protexe fronte á calcificación das arterias, están relacionadas coa velocidade de crecemento do aneurisma nas súas fases iniciais.
Futuro marcado por biomarcadores sanguíneos
Os resultados amosan unha relación inversa entre a degradación do pirofosfato no sangue e o crecemento do aneurisma, o que suxire que algúns procesos de calcificación poderían contribuír a estabilizar a parede da aorta en determinados pacientes. Neste contexto, o estudo achega unha base científica para o desenvolvemento futuro de biomarcadores sanguíneos que permitan mellorar a estratificación do risco e o seguimento personalizado dos pacientes con aneurisma de aorta abdominal.
O traballo desenvolto en colaboración con centros de investigación e hospitais de Dinamarca e España, empregando datos dunha cohorte poboacional europea VIVA. “Actualmente, o seguimento dos aneurismas pequenos baséase case exclusivamente en probas de imaxe. Os nosos resultados abren a porta a identificar procesos biolóxicos medibles en sangue que poderían axudar no futuro a predicir a súa evolución”, explica o doutor Ricardo Villa-Bellosta, investigador principal do estudo.
Os autores subliñan que, aínda que se trata dun estudo piloto, os resultados xustifican a realización de novos estudos clínicos a maior escala que confirmen estes achados e avalían a súa posible aplicación clínica.
Referencia: Inverse correlation between plasma pyrophosphate hydrolysis and early growth of abdominal aortic aneurysm: a pilot study (Publicado en Journal of Molecular Medicine)
