Sofocos, dor articular e sequidade: síntomas máis frecuentes na menopausia

Sofocos, dor articular, sequidade. Son síntomas habituais cando desaparece a menstruación, poñendo fin á capacidade reprodutiva da muller. Con motivo do Día Mundial da Menopausia, que se celebra este 18 de outubro, publícase unha enquisa realizada a 1.750 mulleres en España, co obxectivo de mostrar que lle acontece ao corpo e á mente cando cesan os ciclos menstruais. A investigación foi desenvolvida pola Asociación Española para o Estudo da Menopausia (AEEM).

Segundo recollen na enquisa, o 61,3% das mulleres entre 40 e 70 anos tiveron a súa última menstruación hai un ano ou máis. Tamén se mencionan as perimenopáusicas -que supoñen o 8,3%- e fan referencia a aquelas mulleres que menstruaron hai menos dun ano pero que presentan síntomas característicos da menopausia.

Publicidade

O 8,3% das mulleres tiveron a menstruación hai menos dun ano, pero xa presentan síntomas característicos da menopausia

No que respecta aos síntomas, o 51,7% das mulleres participantes sinalaron a dor de articulacións e a sequidade vulvar ou vaxinal como os máis frecuentes. Logo viría a pel seca, nun 45,5% e a falta de desexo sexual, que se situaría no 43,8%. O quinto síntoma serían os sofocos, nun 40,9%, que adoita ser o máis intenso durante os primeiros anos da menopausia.

En relación ás mulleres perimenopáusicas, os síntomas non coinciden exactamente. Elas sinalan que o máis frecuente son os sofocos, nun 66,4%. O segundo sería o insomnio, que afectaría ao 58,2% das mulleres participantes na enquisa. Finalmente, a sudoración nocturna e as dores nas articulacións acadaríal, conxuntamente, o 54,8%.

O tratamento

Malia os síntomas que se citan na enquisa, só o 16,7% das mulleres recibe tratamento para afrontar a menopausia. Ben poden acudir á terapia hormonal, a compostos naturais ou a tratamentos non hormonais. O efecto máis preocupante da primeira opción é o risco de cancro (68,8)%, así como o aumento das posibilidades de sufrir trombos ou problemas de carácter circulatorio (21,9%). As cifras son semellantes para as mulleres perimenopáusicas, onde o 19,7% delas acoden aos tratamentos.

Parella e relacións sexuais

En relación a como afecta a menopausia á parella e ás relacións sexuais, o 67,2% das mulleres participantes na enquisa asegurou manter a súa actividade sexual. Unha cifra que aumenta ata o 81,5% cando se fala das perimenopáusicas. Aínda que un dos factores que máis inflúe é a idade: as mulleres de 40 a 49 anos mantéñenas con máis regularidade (85,5%), mentres que as cifras se van reducindo na franxa de 50 a 59 anos (74,1%) e na de máis de 60 (58,6%).

Hábitos saudables

Relacionado cos hábitos de vida saudables, o 34,5% das mulleres con menopausia que participaron na enquisa indicaron que se teñen sobrepeso, mentres que o 17,4% teñen obesidade. Unhas cifras que se reducen, aínda que lixeiramente, no caso das perimenopáusicas. En relación á práctica de exercicio regular, as mulleres con menopausia fano con máis frecuencia (77%) que as que aínda están nos inicios da etapa (70,5%).