Unha illa baixo un manto de cinza. Así se pode ver La Palma, que xa cumpre un mes dende que o volcán de Cumbre Vieja entrou en erupción. As cifras da destrución non deixan indiferente a ninguén. Segundo os últimos datos facilitados polo Goberno de Canarias, a superficie afectada xa ascende a máis de 740 hectáreas. Mais tamén está o dano causado ás edificacións. Son 1.835 as construcións destruídas, tal e como revela o satélite Copernicus. E outras 100 danadas ou en perigo. Dá igual que sexan vivendas, tendas ou invernadoiros.
Unha forma de achegarse á illa dende a distancia é a través das imaxes da empresa I Love the World. Unha produtora audiovisual que está retratando como La Palma se esconde baixo a cinza do volcán. Un dos seus fotógrafos é Alfonso Escalero, coñecido pola imaxe da casa illada pola erupción. Unha vivenda atrapada entre a lava, inaccesible pero supervivente, aínda que finalmente tamén sucumbiu ao magma. Unha das edificacións que máis aguantaron, tendo en conta as consecuencias do volcán: arrasar vilas enteiras como Todoque e obriga de evacuar a miles de palmeiros.
