Teñen o aspecto dunha amora pequena, e poden medir desde dous milímetros ata varios centímetros de diámetro. As malformacións cavernosas cerebrais, que afectan arredor de unha de cada 200 persoas, o 0,5% da poboación, son unhas alteracións dos vasos sanguíneos no cerebro que provocan un amplo abano de problemas: desde convulsións ata cefaleas, pasando por déficits neurolóxicos focais ou, nalgún dos peores escenarios, hemorraxias que ás veces acaban co falecemento do paciente, xa que poden evolucionar e causar danos no cerebro e mesmo na medula espiñal.
Na actualidade, o único tratamento posible contra estas malformacións (cuxa orixe na maioría dos casos é descoñecida, e en moi raras ocasións, hereditaria) é a cirurxía. Porén, non se pode realizar en todos os casos. Cómpre, por tanto, atopar novas opcións, e niso traballa o Laboratorio de Bioloxía Vascular do CiMUS, que dirixe o catedrático de Fisioloxía Juan Zalvide: identificar e probar posibles dianas terapéuticas para tratar o problema.
Para iso, o grupo acaba de lanzar a través da plataforma Sumo Valor da Universidade de Santiago de Compostela unha campaña de micromecenado, que ata o vindeiro 31 de marzo busca recadar ata 45.000 euros para o proxecto, que leva por nome Identificación e testado de dianas para malformacións cerebrais vasculares.
“Ata agora téñense desenvolvido varios modelos celulares que reproducen moitas das características das que forman esas malformacións; con todo, o seguinte paso relevante de fronte ao desenvolvemento de tratamentos farmacolóxicos é utilizar eses modelos para identificar moléculas específicas aos que estas células alteradas sexan máis sensibles que as células sas, para poder usar esas moléculas como fármacos”, explica o doutor Zalvide.
Así, este proxecto intentará “atopar moléculas que, no futuro, permitan desenvolver fármacos cos que tratar estas malformacións, trastornos que ata a data só son abordables mediante neurocirurxía”, engade.
O equipo xa ten pistas de algúns posibles candidatos, como algúns fármacos xa usados na clínica. É o caso do propanolol ou os inhibidores de receptores tirosina quinadas ou da ruta de mTOR. Dependendo do financiamento que obteña o proxecto, poderase abordar un screening máis amplo de moléculas.
A iniciativa Sumo Valor, lanzada hai varios meses pola USC, busca potenciar a interacción coa sociedade e crear un espazo de encontro que implique a empresas, institucións e sociedade civil nos proxectos que desenvolve a universidade en materias como investigación, cultura ou deportes
As doazóns poden realizarse a través da plataforma Sumo Valor, nesta ligazón.
