As arterias contan con mecanismos naturais que evitan que o calcio se deposite nas súas paredes. Unha nova investigación publicada na revista científica Molecular Medicine sinala que o consumo elevado e continuado de frutosa pode alterar unha desas defensas. O estudo foi realizado no grupo Homeostase Metabólica e Calcificación Vascular do Centro de Investigación en Medicina Molecular e Enfermidades Crónicas (CiMUS) da Universidade de Santiago e do Instituto de Investigación Sanitaria de Santiao (IDIS), dirixido polo investigador Ricardo Villa Bellosta.
O proceso comeza no fígado, un dos principais órganos encargados de metabolizar frutosa. Cando está exposto de forma prolongada a cantidades elevadas deste azucre, as súas mitocondrias —as estruturas que producen a enerxía que necesitan as células— empezan a funcionar peor.
Como consecuencia, diminúe a produción de ATP, unha molécula que adoita describirse como a moeda enerxética do organismo. Pero o ATP non só achega enerxía: tamén permite fabricar pirofosfato, unha molécula que circula polo sangue e axuda a impedir que o calcio e o fosfato formen cristais na parede dos vasos sanguíneos. O estudo mostra que unha exposición prolongada á frutosa reduce os niveis de ATP e de pirofosfato. Os investigadores comprobaron ademais que, nestas condicións, o tecido vascular se calcificaba con maior facilidade no laboratorio.
Ultraprocesados e bebidas azucradas
“O traballo non demostra que o consumo de froita provoque calcificación arterial. A froita enteira contén fibra, auga e vitaminas, e posúe unha estrutura que fai que os seus azucres se absorban de forma máis gradual. A exposición estudada aproxímase máis a unha inxestión elevada e frecuente de fructosa libre, como a que pode producirse con bebidas azucradas e determinados produtos ultraprocesados”, recalca Villa-Bellosta.
Ata o de agora, os efectos cardiovasculares asociados ao exceso de frutosa relacionábanse principalmente coa resistencia á insulina, a inflamación, o ácido úrico e o estrés oxidativo. Os novos resultados engaden outra peza: a perda de substancias que protexen directamente as arterias fronte á acumulación de minerais. O estudo contou con financiamento de diferentes organismos e institucións, entre eles a Axencia Estatal de Investigación, a Xunta de Galicia e a Sociedade Española de Nefroloxía.
Referencia: Chronic fructose intake disrupts extracellular ATP–pyrophosphate homeostasis and increases susceptibility to aortic calcification (Publicado en Molecular Medicine)
