O Hospital Gil Casares, incluido no Complexo Hopitalario Universitario de Santiago (CHUS), inaugurou unha unidade mixta de investigación oncolóxica de precisión, na que colaborarán coa compañía farmacéutica Roche Pharma en varias liñas científicas.
A apertura desta unidade de investigación creará sete postos de traballo e contará con 30 persoas involucradas. O obxectivo é impulsar a investigación traslacional, é dicir, o traslado á aplicación médica do desenvolvemento de fármacos, e xerar novas sinerxias no sector biomédico de Galicia. Ademais, aspira a converterse nun referente en España no desenvolvemento de proxectos investigadores dirixidos a conseguir un medicamento oncolóxico personalizado, segundo manifestou o presidente da Xunta, Alberto Núñez Feijoo.
Annarita Gabriele (Roche): ‘Incorporaremos novas técnicas de xenética molecular’
Annarita Gabriele, de Roche Pharma, destacou que a compañía aposta por “incorporar novas técnicas de bioloxía e xenética molecular que están a acelerar a identificación de proteínas clave para o tratamento do cancro“. Concretamente, como explicou, o traballo desenvolverase en tres obxectivos específicos: o desenvolvemento de estratexias innovadoras para o estudo da biopsia líquida en pacientes con cancro de mama e próstata; estudos moleculares relacionados coa metástase; e a creación de novas ferramentas de diagnóstico baseadas en nanotecnoloxía.
É a primeira colaboración deste tipo á que se suma Roche a nivel mundial e é pioneira en España. Feijóo asegurou que no ámbito da ‘cooperación público-empresarial’, Galicia xa conta 19 unidades mixtas de investigación nun ano, que segundo os datos que di manexar, xeraron 70 millóns de euros en investimentos e 270 postos de traballo.
