Con 41 casos confirmados (27 deles na rexión Norte), e 375 sospeitosos, Portugal incrementou este luns as medidas de contención contra o coronavirus en todo o país. O último relatorio da situación, difundido pola Direção Geral da Saúde Pública (DGS) (ver PDF), recoñece “seis cadeas de transmisión activas”, con 67 casos que agardan confirmación das análises de laboratorio e preto de 670 persoas baixo vixilancia das autoridades sanitarias.
No norte do país, as cámaras municipais están tomando xa a decisión de cancelar eventos multitudinarios ao longo deste mes de marzo, seguindo as recomendacións da DGS. Así, eventos con grande afluencia de persoas procedentes de Galicia, como a feira quincenal de Ponte de Lima, non se celebrará os días 16 e 30 de marzo. Tamén se suspendeu a Feira de Artesanato do 22 deste mes, así como todas as actividades culturais no teatro Diogo Bernardes e as outras que sexan organizadas e promovidas polo municipio, así como a limitación das actividades deportivas.
En Braga, a principal cidade setentrional, a cámara suspendeu por “tempo indeterminado” programas deportivos dirixidos a persoas maiores, doentes oncolóxicos e diversidade funcional, entre outros. Do mesmo xeito, quedou adiada para o 6 de setembro a media maratón que se ía celebrar prevista para o 22 de marzo na cidade.
Noutras das principais vilas próximas a Galicia, como Vilanova da Cerveira e Viana do Castelo, quedaron suspensos diversos eventos culturais e deportivos que se ían celebrar nas próximas dúas semanas e pecháronse diversas instalacións públicas.
Estas novas decisións súmanse ás xa anunciadas durante a fin de semana, coa prohibición de visitas a hospitais na rexión Norte e a suspensión das aulas de varias universidades.
Galicia prepárase ante o “cambio de escenario” fronte ao coronavirus
Corentena en Felgueiras e Lousada
As medidas máis estritas estanse tomando nos municipios de Felgueiras e Lousada, moi preto de Guimarães e a pouco máis de 100 quilómetros de Vigo e Ourense, onde se concentran boa parte dos casos e as conseguintes cadeas de transmisión. As dúas cámaras anunciaron decisións “excepcionais”. Así, suspendeuse a actividade nos locais de lecer/culturais e de utilización pública, como ximnasios, piscinas, bibliotecas, cinemas e espazos para eventos”. Ademais, pecháronse os edificios municipais de acceso ao público.
Con todo, os autarcas (alcaldes) dos dous municipios, nunha conferencia de prensa conxunta celebrada este luns, apelaron á “serenidade, colaboración e responsabilidade” dos cidadáns. “Coa colaboración de todos, imos conseguir que a normalidade volva imperar”, apuntan desde a Cámara de Lousada.
Do mesmo xeito, no municipio de Ílhavo, preto de Aveiro, a Cámara Municipal pediu aos asistentes a varias actividades culturais que tiveron lugar os días 6 e 7 de marzo que contactaran cos servizos rexionais de saúde despois de recibir a información da presenza nestes actos dunha persoa afectada polo Covid-19.
ℹ️🦠#COVID19PT Apelo: A ARS Centro solicita aos participantes dos seguintes espetáculos que contactem a Autoridade de Saúde, através dos números de telemóvel 910 700 272 ou 910 700 762, para informação acerca dos procedimentos a observar face eventual infeção pelo #SARSCoV2
— VOST Portugal 🇵🇹 (@VOSTPT) March 10, 2020
