O CSIC en Galicia conta con equipos e persoal para colaborar no diagnóstico da doenza.
O CSIC en Galicia conta con equipos e persoal para colaborar no diagnóstico da doenza.

Os centros do CSIC en Galicia ofrecen a súa axuda á crise

A Misión Biolóxica de Galicia, O Instituto de Investigacións Mariñas e o Instituto de Investigacións Agrobiolóxicas dispoñen de equipos e persoal para colaborar

Coa declaración do estado de alarma e a preparación ante a posible chegada dunha fase aguda da crise, a ciencia en Galicia mobilizouse para botar unha man. Ademais do inxente traballo desenvolvido polos científicos do sistema sanitario, universidades, centros de investigación e empresas puxéronse a disposición das autoridades para axudar. Dos cinco centros dos que dispón o Consello Superior de Investigacións Científicas (CSIC) en Galicia, tres deles, enfocados á investigación en ciencias da vida, ofreceron recursos e persoal en caso de ser preciso. Falan os seus tres directores; Elena Cartea, da Misión Biolóxica de Galicia, Francisco Saborido, do Instituto de Investigacións Mariñas, e Concepción Sánchez, do Instituto de Investigacións Agrobiolóxicas.

– Que capacidade ten o centro para incorporarse á realización de probas PCR?

Elena Cartea, da Misión Biolóxica de Galicia

Na MBG temos 6 equipos PCR e unha listaxe de 18 persoas (entre técnicos e investigadores) con capacidade e experiencia para facer as análises. As especificacións dos equipos puxémolas a disposición do Sergas o 23 de marzo. Ademais, enviámoslles diverso material sanitario, como equipos de protección individual ( EPIs).

Francisco Saborido, do Instituto de Investigacións Mariñas

No IIM temos 7 equipos PCR e 30 persoas (entre técnicos e investigadores) con capacidade para facer as análises. Ademais temos dous robots de extracción de ARN actualmente cedidos ao Hospital Provincial de Pontevedra, a través da Xefatura Territorial de Sanidade de Pontevedra.

Concepción Sánchez, do Instituto de Investigacións Agrobiolóxicas

No   IIAG temos un equipo de qPCR e 6 de PCR. Enviouse unha listaxe de 7 persoas voluntarias con capacidade de facer estas probas.

Houbo contactos para incorporarse á rede de realización de probas?

Elena Cartea, da Misión Biolóxica de Galicia

Contactamos coa Xunta a través da Xefatura Territorial de Sanidade de Pontevedra. A listaxe do persoal con experiencia nestas análises PCR enviouse directamente ao CSIC hai unhas semanas.

Francisco Saborido, do Instituto de Investigacións Mariñas

O Ministerio de Ciencia e Innovación contactou connosco para formar parte deste plan. O  IIM forma parte do mesmo, e está á espera de recibir os protocolos adecuados e homologados, tanto de manipulación,  inactivación como diagnóstico. Fai tres semanas o Hospital Provincial de Pontevedra solicitounos realizar diagnósticos no IIM, pero non foi posible debido á falta de protocolos e á dispoñibilidade de kits de extracción e diagnóstico. Finalmente o Hospital puido resolver o seu colo de botella e non foi necesaria dita colaboración.

Concepción Sánchez, do Instituto de Investigacións Agrobiolóxicas

Desde o  IIAG contactamos cos servizos de analítica do CHUS (Hospital de Santiago) a principios da pandemia, ofertando os equipos de PCR e outro material funxible. Agradeceron a oferta e quedaron en que se fose necesario contactarían connosco.  A listaxe do persoal con experiencia nestas análises  PCR tamén se enviou ao CSIC.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.