Segundo brote de coronavirus en Galicia en menos dunha semana. Despois dos 9 casos confirmados no Barbanza (6 en Ribeira, 2 en Porto do Son e 1 na Pobra do Caramiñal), a Consellería de Sanidade informou este mércores de que se detectou un foco na comarca da Mariña. Ata o momento, explican, confirmáronse oito positivos.
Todos os casos, segundo a consellería, “pertencen ao círculo familiar no que se rexistrou o primeiro caso”. Tras o positivo desta persoa, na tarde de onte, activouse o protocolo de seguimento e realizáronse as probas PCR a todos os contactos estreitos deste positivo. O rastrexo que se puxo en marcha abrangue a polo menos 37 persoas: 8 delas (incluído o caso inicial) deron positivo en Covid-19, 4 deron negativo e 25 máis están pendentes de resultado. Polo momento, non se aclarou se a orixe do foco está nun caso importado (como aconteceu co do Barbanza) ou de transmisión local.
Neste momento, engade Sanidade, dos oito casos positivos a maioría son asintomáticos, agás dous que presentan sintomatoloxía de carácter leve, mais teñen a obriga de gardar corentena durante 14 días. Do mesmo xeito, as persoas cuxas probas deron resultado negativo permanecerán en seguimento no seu domicilio, asesorados pola Plataforma de Vixilancia Epidemiolóxica e os Servizos de Medicina Preventiva e Saúde Pública do Sergas. Ata o serán do martes, ningún afectado tivera que ser hospitalizado. A Consellería de Sanidade leva rastrexado ata o momento a unhas 40 persoas relacionadas con este brote familiar e séguense a investigar posibles contactos.
Antes de que Sanidade confirmara o foco de Xove, o Ministerio de Sanidad dera conta na súa actualización diaria de tres novos positivos detectados en Galicia. Pola súa parte, a Xunta expoñía que había 331 casos activos este mércores. Deles 108 son da área da Coruña, 17 da de Lugo, 21 da de Ourense, 8 da de Pontevedra, 135 da área de Vigo, 31 da de Santiago, e 11 da de Ferrol.
Por outra banda, o foco detectado no Barbanza mantense baixo control, segundo fontes de Sanidade, mentres que está a facer un seguimento de máis de 100 persoas. Só nove delas deron positivo, pero o resto das persoas deberán gardar corentena aínda que o seu resultado sexa negativo.
Ante a aparición do foco en Xove, o Sergas insiste en “lembrar á ciudadanía a necesidade de continuar a aplicar as medidas hixiénico-sanitarias establecidas desde o inicio da pandemia do coronavirus, poñendo especial énfase na necesidade de empregar sempre as máscaras naqueles espazos onde non é posible gardar a distancia de seguridade social”.
Focos e rebrotes en Galicia: un risco real nas vindeiras semanas
