O Hospital Público Álvaro Cunqueiro de Vigo acadou un logro médico excepcional ao conseguir salvar a vida dunha muller xestante e garantir o desenvolvemento satisfactorio do seu bebé tras unha intervención cirúrxica de máxima complexidade. Trátase dun caso único en Galicia que subliña a capacidade de resposta do centro ante situacións de extrema dificultade médica.
Este caso comezou o 1 de maio pasado, cando unha paciente embarazada de 24 semanas ingresou de urxencia no Hospital Público Álvaro Cunqueiro de Vigo por un síndrome aórtico agudo. Concretamente, era unha Disección Aórtica Aguda tipo A, a variante de peor prognóstico e cunha incidencia de apenas 2-3 casos por cada 100.000 habitantes ao ano. Neste caso, a situación era especialmente delicada ao tratarse dunha paciente xestante.
Unha enfermidade con alto risco vital
Esta patoloxía cardíaca presenta unha mortalidade moi elevada nas primeiras horas e require unha intervención cirúrxica urxente. Así, dada a gravidade da situación vital da nai e sopesando as opcións de viabilidade fetal, o equipo facultativo decidiu realizar a intervención cardiovascular sen cesárea previa e sen obviar tamén que a parada circulatoria interrompería temporalmente o fluxo sanguíneo cara ao feto durante aproximadamente 30 minutos.
A cirurxía, con hipotermia controlada a 28ºC e un estrito manexo da presión arterial para preservar os órganos vitais da nai e do feto, foi realizada polo equipo de Cirurxía Cardíaca, formado polos doutores Francisco Estévez e Rocío Casais, xunto cos anestesiólogos José Luis Barreiro e Iria de la Torre, e coa implicación dun amplo grupo multidisciplinar de profesionais.
O procedemento seguido consistiu en realizar unha esternotomía, empregar circulación extracorpórea, unha máquina que substitúe temporalmente as funcións do corazón e dos pulmóns. En moitos casos, aplicar unha parada circulatoria completa, arrefriando previamente á paciente e protexendo especificamente a circulación cerebral.
Evolución favorable e nacemento da nena
A paciente evolucionou favorablemente, recibindo a alta hospitalaria o 14 de maio e continuando co seguimento xestacional sen incidencias. Finalmente, o pasado 5 de agosto practicouse unha cesárea programada no mesmo centro hospitalario, co nacemento desta nena sa que evoluciona normalmente e sen complicacións.
Este caso constitúe un feito excepcional en Galicia: é a primeira nena nacida na comunidade tras unha cirurxía de aorta con parada circulatoria durante a xestación. A nivel internacional, os casos descritos na literatura médica son moi escasos.
O éxito acadado pon de manifesto a excelencia e coordinación do traballo multidisciplinar que reúne a cirurxiáns cardiovasculares, anestesiólogos, cardiólogos, radiólogos, obstetras, neonatólogos, persoal de enfermaría e outros profesionais da Área Sanitaria de Vigo, e subliña a capacidade de resposta deste centro en situacións de máxima complexidade.
