Para converter ao paciente nun axente activo da súa propia recuperación, o Instituto de Investigación Sanitaria Galicia Sur (IISGS) e o Hospital Público Álvaro Cunqueiro en Vigo lanzan un innovador proxecto que combina o exercicio físico terapéutico —cuxos beneficios sobre a fatiga, o estado cardiovascular e a saúde emocional nos procesos oncohematolóxicos están amplamente demostrados— coa tecnoloxía de última xeración. Así, mediante o uso de lentes de realidade virtual inmersiva (RVI), o paciente ingresado no hospital para recibir un transplante de medula ósea ou un CART axúdaselle a afrontar o illamento que ocasiona unha perda drástica de movemento e mitigar a deterioración física consecuente. Así, inmersése en ambientes virtuais paralelos, motivadores e lúdicos (a través do exergaming ou terapia de xogo) que reducen o estrés, alivian a ansiedade e melloran a tolerancia á dor, facilitándolle manterse fisicamente activo durante o tempo de ingreso.
Un enfoque interdisciplinar e pioneiro
O proxecto naceu da colaboración de equipos multidisciplinares do IISGS. Está liderado pola Dra. Carmen Albo, xefa do Servizo de Hematoloxía e Hemoterapia do Hospital Álvaro Cunqueiro e investigadora principal do grupo de Hematoloxía e Hemoterapia do IISGS, e coordinado polo Dr. Pablo Campo, investigador do grupo HealthyFit no IISGS e da Universidade de Vigo, e experto na aplicación da realidade virtual inmersiva. Tamén conta co apoio e a implicación directa da Asociación Galega de Persoas Afectadas por Transplantes de Medula Ósea (ASOTRAME), contribuíndo a que o deseño responda fielmente ás percepcións e necesidades reais dos usuarios, e cos equipos de Fisioterapia, Psicoloxía e Enfermaría que atenden habitualmente a estes pacientes. Así mesmo, o proxecto conta co apoio de Igalia – Free Software Consulting facilitando a compra do equipamento técnico para este proxecto.
“O exercicio é seguro e necesario durante estes tratamentos intensivos, pero a incerteza e o illamento merman a adherencia dos pacientes ás táboas de exercicio convencional “, explica a doutora Carmen Albo. Pola súa banda, o doutor Pablo Campo destaca que a realidade virtual inmersiva “permite un enfoque multisensorial onde o paciente interactúa cun ambiente agradable que gradúa a intensidade do esforzo en tempo real, transformando o esforzo físico nunha experiencia lúdica e motivadora. Poder trasladarse a outros lugares e escenarios sen saír da habitación, tamén contribúe ao benestar emocional durante o período de ingreso.”
O proxecto será avaliado mediante un ensaio clínico que comparará os resultados dos pacientes que usan esta tecnoloxía fronte ao programa convencional de exercicio terapéutico.
