A cifra de mortes atribuídas á exposición do fume ambiental do tabaco (HAT) é relevante tanto en España como en Galicia. No ano 2020, estimouse que esta exhibición produciu 747 mortes no conxunto do Estado. Durante o período 2016-2021, foron 4.970 as mortes asociadas ao cancro de pulmón e á cardiopatía isquémica, cun total de 280 mortes localizadas en Galicia.
Estas son as principais achegas da tese doutoral de Diana Carolina López Medina baixo o título Carga de mortalidade atribuída á exposición ao fume ambiental do tabaco en España: estimacións e achegas metodolóxicas. O traballo, que foi dirixido polas doutoras do grupo de Medicina Preventiva e Saúde Pública do Instituto de Investigación Santiaria (IDIS) Mónica Pérez Ríos e María Leonor Varela Lema, conta co financiamento do Instituto de Saúde Carlos III.
A tese céntrase no impacto da exposición ao fume ambiental do tabaco e as súas consecuencias inmediatas e a longo prazo na saúde da poboación, un tema especialmente relevante dado os últimos avances lexislativos que se enmarcan dentro do Plan Integral para a Prevención e Control do Tabaquismo do Goberno español. A tese defendida pon de manifesto a importancia do fume ambiental de tabaco como factor de risco para a saúde, tanto a nivel mundial como en España.
Resultados
Ata a realización desta investigación non se dispoñía de estimacións de mortalidade atribuída ao fume ambiental de tabaco desagregada para as diferentes comunidades autónomas de España, obxectivándose a variabilidade existente. Isto achega información importante para direccionar as estratexias de saúde pública e lexislativas en cada zona xeográfica.
En relación coas estimacións da mortalidade atribuída (MA) ao fume ambiental de tabaco (HAT) en España, e asociado a un descenso na prevalencia de exposición desde o ano 2006, contémplase un descenso nas estimacións de MA á exposición ao fume ambiental de tabaco. No ano 2020 en España, a morte dun non fumador asociada á exposición ao HAT relacionábase á existencia de 400 fumadores.
A carga de mortes varía entre comunidades autónomas. Andalucía é a máis prexudicada, mentres que en Madrid o impacto foi menor. En España, a mortalidade atribuída ao HAT non é despreciable e é totalmente evitable, o que reforza a necesidade de seguir avanzando en políticas de control de tabaquismo que protexan de forma integral á poboación.
Unha tese do IDIS cifra os falecementos entre 2016 e 2021 por cancro de pulmón e cardiopatía isquémica asociados ao impacto indirecto do consumo de cigarros
