Desde hai tempo, a ciencia explora a posibilidade de que determinadas infeccións por virus e bacterias estean detrás dalgúns tipos de cancro. Alén dos moi citados factores de risco, como o tabaquismo e o alcolismo, a mala alimentación, o sedentarismo e o propio azar xenético, a influencia de bacterias como a Helicobacter pylori na aparición de tumores dixestivos preocupa aos investigadores. Neste aspecto céntrase un estudo que acaban de publicar na revista Medicina Clínica científicos cataláns e italianos, e que conclúe que un 8,3% das mortes por cancro en España no período 2013-2017 se poden atribuír a axentes infecciosos.
O traballo, que recolle Materia, apunta a que un 48,3% destas mortes atribúense á H. pylori, mentres que ao sumar outros tres axentes, como o virus da hepatite B e C e o virus do papiloma humano, estes catro factores representan o 96,8% dos falecementos por esta causa. En números absolutos, 9.115 persoas faleceron en España nese tempo por cancros desencadeados por virus o bacterias.
O traballo foi dirixido polo equipo de Josep Maria Ramón, do Instituto de Investigación Biomédica de Bellvitge. “É o primeiro estudo realizado en España que intenta cuantificar e explicar a mortalidade por cancros cuxa orixe son infeccións”, explica Ramon. A H. pylori está presente no organismo de máis da metade das persoas en España, que pode manterse no corpo sen xerar ningún efecto, pero tamén causar úlceras e mesmo cancro gástrico.
No tocante á incidencia (o estudo só se centra na mortalidade), Ramón apunta a que os tumores con orixe infecciosa poden estar arredor do 12 ao 16% do total.
Alén dos tumores do aparello dixestivo, o traballo afonda tamén nos cancros de fígado causados polo virus da hepatite B e C (que se contaxia polo sangue e algunhas prácticas sexuais de risco). Tamén se pon o foco no virus do papiloma humano, que causa unha gran maioría dos tumores de colo de útero, e que poden previrse a través da vacinación.
Cinco razóns para confiar na vacina contra o virus do papiloma humano
Con todo, os autores salientan que este 8% é menor ao risco demostrado por outras causas, como o tabaquismo, que está detrás das mortes dunha gran porcentaxe de tumores de pulmón, esófago, estómago ou fígado.
Referencia: Mortalidad por cáncer atribuible a infecciones en España (Publicado en Medicina Clínica).
