As bágoas poden adiantar o risco de padecer queratocono, unha enfermidade dexenerativa nos ollos que leva á perda de vista e unha merma da calidade de vida. É o froito da investigación feita polo grupo de Neurodexeneración corneal do IDIS baixo o liderado da doutora Isabel Lema, que conseguiron identificar biomarcadores clave para a detección precoz desta doenza en fillos de pacientes que a padecen.
O estudo, publicado recentemente en Investigative Ophtalmology & Visual Science, supón un grande avance na diagnose desta enfermidade da cornea, que se volve irregular como consecuencia dunha alteración do coláxeno. A investigación feita polo instituto santiagués consistiu na análise do perfil de proteínas no líquido lacrimal de persoas xoves sans con pais diagnosticados con queratocono.
A través de modelos de regresión, foron identificados tres paneis biomarcadores con alta sensibilidade e especificidade para detectar as alteracións biomecánicas corneais e a historia familiar de queratocono. Deste xeito, conseguiron delimitar 15 proteínas alteradas vinculadas ao estrés oxidativo, a adhesión celular e a estrutura da córnea.
“Estas alteracións aparecen antes mesmo de que os cambios clínicos sexan detectables polos métodos actuais”, explica a doutora Isabel Lema, que subliña que os achados do seu grupo revelan que o dano comeza moito antes de que a córnea amose signos de debilidade, o que abre a porta a poder previr o desenvolvemento da doenza.
O que din as bágoas
Porque, como resalta a profesora da área de Oftalmoloxía da Universidade santiaguesa, as nosas bágoas “non só protexen os nosos ollos”, senón que tamén “contan unha historia sobre o seu futuro”. Así, o achado que permite “escoitar” o que pode predicir as excrecións dos ollos permite adiantar os tratamentos da enfermidade, especialmente entre os fillos de pacientes que a sofren.
“Detectar a tempo ás persoas con maior risco permitirá intervir antes de que se produza un dano irreversible, e prantexa un novo enfoque preventivo baseado en biomarcadores lacrimais“, sinalan as investigadoras no seu estudo, que subliña a necesidade de controlar aos descendentes de afectados, malia que non amosen síntomas.
Na actualidade, a diagnose de queratocono faise cando xa existe unha alteración visual notable e unha dexeneración irreversible no tecido corneal. O estudo do IDIS é pioneiro en demostrar que a enfermidade empeza moito antes a nivel molecular e que as bágoas son a clave para anticiparse. “Aprendimos a escoitar as bágoas”, conclúen.
