O grupo de Hematoloxía Computacional e Xenómica (GrHeCo-Xen) do IDIS acaba de presentar o desenvolvemento dun novo modelo para mellorar a predición do risco dos pacientes con síndromes mielodisplásicas, a través dunha colaboración co Grupo Español de Síndromes Mielodisplásicos (GESMD). Estas enfermidades son un grupo de neoplasias da medula ósea que afectan a produción de células sanguíneas sas, levando a problemas como anemia e un maior risco de leucemia. O estudo coordinado polos doutores Adrián Mosquera (CHUS) e David Valcárcel (Hospital Vall D’Hebron), analiza datos procedentes dun total de 7.202 pacientes de 90 hospitais españois.
A nova proposta baséase nunha ferramenta de intelixencia artificial que utiliza datos rutineiros de miles de pacientes para proporcionar predicións de risco máis precisas, comparado cos métodos tradicionais, e que acada un rendemento similar a aquelas que incorporan datos extensivos de mutacións no xenoma. “Este modelo demostrou unha maior capacidade discriminativa en comparación co tradicional e agardamos que se converta nun método amplamente utilizado pola comunidade médica internacional”, sinala o Dr. Mosquera.
A neoplasia mielodisplásica é unha enfermidade aínda sen terapias altamente efectivas e, actualmente, o único tratamento curativo para os pacientes é o transplante aloxénico de células nai, “pero está reservado para unha minoría de pacientes aptos debido á súa importante morbilidade e mortalidade”, sinala o coordinador do grupo GrHeCo-Xen, Adrián Mosquera. Ademais, outros factores como a dispoñibilidade de doantes adecuados e a importante carga económica asociada ao procedemento expoñen moitas dificultades á hora de recibir tratamento. O novo modelo permitiría mellorar a predicción do risco nesta enfermidade: “Sería clave para seleccionar candidatos óptimos para o tratamento con células nai e para avaliar o resultado dos fármacos dentro dos novos ensaios clínicos, facilitando unha decisión equilibrada entre a toxicidade e a gravidade da enfermidade”, sinalan dende o IDIS.
Publicado en HemaSphere
O traballo acaba de ser publicado no prestixioso journal HemaSphere, comunicación científica oficial da Asociación Europea de Hematoloxía (EHA), e previamente foi seleccionado como comunicación oral no congreso anual da Sociedade Americana de Hematoloxía (ASH) en decembro do 2022. “Isto reflicte a boa calidade do traballo realizado, pero tamén o elevado interese que ten para a comunidade hematolóxica a nivel internacional”, afirma o Dr. Mosquera, “agradecemos moito a colaboración co Grupo Español de SMD e a elevada calidade das bases de datos que puxeron á nosa disposición, o mérito do resultado é en gran medida seu”. O investigador tamén sinalou: “Cremos que todos estes factores farán que o novo método sexa máis empregado e que no futuro poida ser enriquecido con máis fontes de información relevante, como a xenómica”.
Que é unha neoplasia mielodisplásica?
As síndromes mielodisplásicas son trastornos que afectan á medula ósea, que é o “motor” de produción de células sanguíneas no noso corpo. Nestas síndromes, algo sae mal neste proceso, o que resulta nunha cantidade inadecuadamente baixa de células sanguíneas sas. Isto pode levar a varios problemas de saúde, como anemia, que é a falta de suficientes glóbulos vermellos para levar osíxeno por todo o corpo. Ademais, as persoas con síndromes mielodisplásicos teñen un maior risco de desenvolver formas máis graves de cancro de sangue, como a leucemia. É un tema de preocupación especialmente en persoas maiores, aínda que tamén afecta a persoas na idade adulta.
