O 18 de novembro de 2022 detectáronse os primeiros casos en España da enfermidade
hemorráxica epizoótica en vacas. Uns días antes fora identificada na illa de Sardeña, en Italia, e era cuestión de tempo que chegase a Galicia. Non hai vacinas nin tratamento e é moi difícil controlar a súa expansión. Non é contaxioso para os seres humanos e propágase pola picadura de insectos do xénero Culicoides. Esta e a lingua azul son as dúas enfermades víricas que máis afectan a Galicia na actualidade. O cambio climático e a globalización están a provocar que os patóxenos se propaguen a áreas xeográficas novas, e os científicos agardan que nos vindeiros anos teñamos que enfrontar novas enfermidades.
Para comprender esta cuestión e para abordar outras como as resistencias aos antibióticos, no oitavo episodio de Investigar na USC falamos con Gonzalo Fernández, decano de Veterinaria da universidade. Explícanos que o cambio climático está influíndo de forma directa nas enfermidades que se trasmiten por vectores. “O clima fai que se multipliquen en zonas onde antes non as había”, apunta. O decano ponnos tamén ao día sobre as enfermidades ás que os científicos miran e que poderían entrar en Galicia nos próximos anos.
Escoita Investigar na USC en: Spreaker, Spotify, Ivoox, iHeart, Google Podcasts, Deezer, Podcast Addict, JioSaavn e Podchaser.
