A enquisa do Centro de Investigacións Sociolóxicas (CIS) publicada este venres, na que se abordaban os efectos e consecuencias da pandemia do coronavirus SARS-CoV-2, ofreceu varios datos que tiveron unha notable repercusión, sobre no todo no referente á vacinación. A espera de que comecen as primeiras campañas masivas de inmunización a finais deste ano e comezos de 2021, con varios proxectos nas súas últimas fases de ensaios clínicos e á espera da autorización das axencias sanitarias, as dúbidas que rodean as vacinas, claves para que a sociedade volva a recuperar de forma progresiva a súa vida cotiá previa a marzo de 2020, seguen sendo elevadas.
Un 55% das persoas entrevistadas polo CIS amosan algunha reserva sobre a vacina, apuntando que “preferirían esperar a coñecer os efectos”, á pregunta de se estarían dispostos a vacinarse inmediatamente, mentres que un 8,4% non estaría disposto a poñela en ningún caso. E un 32,5%, por outra banda, sostén que si estaría disposto a inmunizarse en canto fose posible e sen reservas.
Outra das respostas á enquisa expón as dúbidas que permanecen a pesar das indicacións sanitarias. Mentres un 37,9% expón que se vacinaría inmediatamente se o recomenda o seu médico/a polo risco de contaxiar a familiares próximos, un 16,7% di que non o faría en ningún caso.
Dúbidas entre a xente nova
Sempre segundo os datos do CIS, as dúbidas parecen máis presentes nos rangos de idade máis baixa. As porcentaxes de persoas que non estarían dispostas a vacinarse en ningún caso superan o 10% na franxa de 25 a 44 anos. E as persoas que preferen esperar a coñecer so efectos superan o 60% entre os 18 e os 34 anos, chegando ao 72,3% no caso dos 18 a 24.
Cales son as dúbidas?
Tanto Galicia como España amosan algunhas das taxas de inmunización máis altas (arredor do 95%) derivadas da vacinación fronte a enfermidades infecciosas que hai pouco máis de 50 anos xeraban decenas de miles de falecementos ou importantes secuelas, como a poliomielite, o sarampelo, a varíola, a rubéola ou as papeiras. Porén, nos últimos anos, as mensaxes dos movementos contra as vacinas están a causar importantes problemas nalgúns países de Europa, cos rebrotes de doenzas como o sarampelo.
E diante da inminente vacina contra a Covid-19, as dúbidas de parte da poboación poden supoñer un importante problema social, toda vez que non afectan só a quen decide non vacinarse (en caso de que non sexa obrigatorio), senón ao resto da cidadanía que, á espera de recibir a súa inmunización, poida desenvolver formas graves da infección ou transmitila a outras persoas, ao non acadar a inmunidade de grupo necesaria.
Diante disto, e durante as vindeiras semanas e meses, e ante o comezo das campañas de vacinación en Galicia e España, GCiencia consultará a persoas expertas en disciplinas como a viroloxía, a inmunoloxía, a epidemioloxía ou a microbioloxía para que respondan as dúbidas máis habituais dos lectores sobre a inmunización fronte á pandemia.
Podes enviar a túa consulta a través das redes sociais de GCiencia, ao enderezo redaccion@gciencia.gal, nos comentarios a esta información ou a través deste formulario.
