O presidente da Xunta, Alfonso Rueda, anunciou este luns que Galicia iniciará o 2 de decembro un novo programa de cribado neonatal para a detección precoz e o tratamento de cardiopatías conxénitas. O obxectivo é identificar este tipo de enfermidades nas primeiras 24 horas de vida dos bebés e antes de que se presenten os seus síntomas a través dunha técnica indolora e non invasiva. Chámase pulsioximetría e serve para medir o osíxeno en sangue do bebé. Así o explica un informe da Consellería de Sanidade que foi avalado esta mañá polo Consello da Xunta.
A Dirección Xeral de Saúde Pública e a Dirección Xeral de Asistencia Sanitaria do Sergas realizarán este cribado de forma universal a todos os bebés nados en Galicia. De feito, Sanidade xa remitiu aos hospitais privados galegos o novo protocolo para que tamén leven á práctica este cribado.
As cardiopatías conxénitas críticas presentan unha incidencia de “dous casos por 1.000 nacementos, poden comprometer gravemente a saúde do bebé e son causa do 20% dos falecementos ocorridos no período neonatal”, sinalou Rueda. A maioría dos defectos críticos teñen certo grao de baixos niveis de osíxeno en sangue, polo que, coa pulsioximetría, en menos de 10 minutos pode obterse a sospeita de cardiopatía. En caso de que a proba sexa positiva, o persoal de enfermaría informará a pediatría ou neonatoloxía para facer unha valoración clínica.
Atención inmediata
Se hai signos de alarma, o novo protocolo para confirmación diagnóstica deseñado por profesionais do Sergas marca a realización dun ecocardiograma en menos de 12 horas. Cando non os hai, a proba será realizada en canto sexa posible, sempre en menos de 72 horas.
Cando o resultado do ecocardiograma é compatible cunha cardiopatía conxénita crítica, realizarase unha interconsulta para valoración inicial telemática coa unidade de referencia do Complexo Hospitalario Universitario da Coruña e o bebé será trasladado en menos de seis horas.
Alternativas terapéuticas
As alternativas terapéuticas previstas serían a medicación, un cateterismo cardíaco (como un pequeno orificio na parede interior do corazón) e unha cirurxía cardíaca infantil (que pode ser necesaria para reparar defectos no corazón e vasos sanguíneos, substituír unha válvula cardíaca, colocar un dispositivo no peito para axudar o corazón a bombear sangue ou facer un transplante).
A posta en marcha deste cribado, de forma secundaria, tamén permitirá identificar hipoxemia por outros motivos que poden ser graves (problemas respiratorios parenquimatosos ou anatómicos, hipertensión pulmonar persistente, outras cardiopatías conxénitas, sepse, hipotermia ou hemoglobinopatías).
Ademais da organización das distintas categorías profesionais do Sergas implicadas neste proceso asistencial, este programa de detección precoz supón a compra de monitores para realizar a pulsioxiometría, por valor de 15.077 euros, e a de sensores adhesivos de saturación de osíxeno neonatal desbotable, por valor de 57.172 euros ao ano, que serán financiados pola Dirección Xeral de Saúde Pública.
A iniciativa de Sanidade súmase á proba do talón para detectar enfermidades endócrinas e metabólicas, “a proba máis completa de España”, que lidera a Dirección Xeral de Saúde Pública.
