Galicia é a segunda comunidade autónoma coa maior taxa de falecidos por incendios en vivendas por millón de habitantes en 2023, acadando un 5,93 e só superada por Estremadura. En total, rexistráronse 16 vítimas mortais das que sete foron homes e nove, mulleres.
Así o recolle o informe Vítimas de Incendios en España en 2023 realizado pola Fundación MAPFRE e a Asociación Profesional de Técnicos de Bombeiros (APTB) que foi presentado este luns xunto a un Atlas Virtual de Vítimas de Incendios; unha ferramenta que dixital que axuda a xestionar toda a información obtida nos estudos deste eido.
No que respecta a Galicia, o informe expón que os meses máis tráxicos para a comunidade foron outubro ―con catro vítimas― e setembro ―con tres falecidos―. Ademais, detalla que o día con maior número de mortes foi o mércores ―con seis pasamentos― e a franxa de hora máis fatídica foi entre as 20 horas e 8 horas, con 11 falecidos.
Así mesmo, o grupo de idade con máis vítimas na vivenda foi o situado entre os 10 e 14 anos, xa que morreron tres rapaces durante o 2023.
Malia isto, os expertos apuntan a que “estes datos deben valorarse con moito coidado, xa que as comunidades autónomas con menos poboación, un mínimo cambio no número de falecidos pode alterar de modo importante as taxas poboacionais e a posición”, aseguran.
Deste xeito, e segundo o mesmo informe, as vítimas mortais en vivenda en Galicia foi crecendo ano a ano. En 2018 foron rexistradas 3 mortes; en 2019, 7; en 2020, 5; en 2021, 12 e en 2022, 13 foron as persoas falecidas nestas circunstancias.
