Venres 29 Marzo 2024

Así se seguirán en Galicia os contactos das persoas infectadas polo coronavirus

A Consellería de Sanidade activa a plataforma tecnolóxica para previr posibles rebrotes cun equipo inicial de 20 operadores

Desde este luns, Galicia conta cun equipo de 20 operadores preparado para comezar un dos alicerces da chamada desescalada, segundo os requerimentos do Ministerio de Sanidad nesta fase 1: a capacidade para localizar os contactos das posibles infeccións por Covid-19 e cortar así de maneira temperá os posibles rebrotes. Así o anunciou a Consellería de Sanidade, coa posta en marcha da plataforma tecnolóxica de seguimento coa que rastrexará e monitorizará os contactos destas persoas infectadas. O departamento sanitario da Xunta estima que este equipo de operadores, dedicado a contactar con estas persoas, superará os 50 profesionais nas vindeiras dúas semanas.

Sanidade explica que este sistema tecnolóxico de rastrexo empregado en Galicia para identificar posibles novos casos contará cun protocolo único, e encargarase de identificar e falar con cada unha das persoas que estiveran próximas a un caso positivo por Covid-19.

Publicidade

Procedemento

Segundo explica a consellería, tras unha consulta médica, presencial ou telefónica, na que o facultativo diagnostique ao paciente como caso sospeitoso de padecer a Covid-19, será solicitada unha proba PCR. Entón, a plataforma tecnolóxica activará unha enquisa inicial a esta persoa que presente síntomas da infección e, tras responder á mesma, pediranlle os datos daquelas persoas coas que puido ter mantido un contacto estreito, desde dous días antes do comezo dos síntomas até o momento do seu illamento.

No caso de que o resultado da proba PCR sexa positiva, solicitáraselle aos contactos que garden corentena durante 14 días desde o último contacto con esta persoa. Así mesmo, comezaría un seguimento diario sobre a posible aparición de sintomatoloxía compatible coa Covid-19 e, de agromar estes síntomas, derivarase ao seu médico. Os devanditos contactos pasarían a ser casos sospeitosos iniciando de novo o ciclo con solicitude de proba PCR, illamento e investigación de novos contactos.

Rastrexadores da Covid-19: o equipo que protexerá Galicia dos futuros brotes

O sistema de rastrexo será monitorizado diariamente por técnicos de Saúde Pública dos Servizos Centrais e das Xefaturas Territoriais, que avaliarán e controlán a calidade de todo o sistema, a validez da información e a resolución de incidencias. Do mesmo xeito, tamén colaborarán nas tarefas de seguimento os departamentos de Atención Primaria, principalmente nos casos confirmados, os servizos de Medicina Preventiva, naqueles casos nos que os pacientes estén ingresados, e os Servizos de Prevención de Riscos Laborais, no caso de producirse algún abrocho neste ámbito.

Desta forma, o Sergas levará a cabo unha vixilancia activa e diaria de tódolos contactos rexistrados podendo, grazas a identificación das súas necesidades específicas, achegar información máis axeitada para cada situación. Sanidade expón que “a plataforma tecnolóxica conta coa flexibilidade suficiente para adaptar a dotación de persoal dedicado especificamente a esta función”, de acordo ás necesidades que vaian xurdindo, e así, verse incrementado proporcionalmente ao número de casos sospeitosos notificados desde o sistema asistencial  ao longo do tempo en función da evolución da pandemia.

2 COMENTÁRIOS

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

Desconcerto ante o aumento da tosferina: os casos en Galicia en febreiro xa superan os de 2023

As causas deste repunte non están claras e as hipóteses están relacionadas co período postpandémico así como coas temperaturas anómalas do inverno

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde