Investigadores do Grupo HealthyFit, do Instituto de Investigación en Saúde de Galicia Sur e da Universidade de Vigo, realizaron recentemente dous estudos destinados a avalar a eficacia das terapias físico-cognitivas apoiadas en tecnoloxías de realidade virtual e dirixidas a casos de dano cerebral adquirido. Trátase dun enfoque pioneiro, xa que ata agora non hai evidencias científicas do uso deste tipo de terapias en persoas con este cadro clínico.
Ámbolos dous estudos foron desenvolvidos en colaboración con Cruz Vermella Lugo en residentes do Centro de Parálise e Dano Cerebral e do Centro de Patoloxía Dual de Castro Riberas de Lea (Lugo); empregando terapias innovadoras a través de exergames (videoxogos activos) que permiten unha estimulación dobre, tanto física como cognitiva.
Un novo enfoque
O primeiro dos estudos —EFiCO_DCA 3.0—, baséase na experiencia adquirida en proxectos previos realizados polo Grupo HealthyFit, consistente en empregar un cicloergómetro intelixente combinado con escenarios virtuais para articular un programa de exercicio físico de alta intensidade, así como diferentes aplicacións con realidade virtual para psicoterapia. Este programa durou 20 semanas, beneficiando a arredor dunha ducia de usuarios do centro.
O segundo estudo —EVI_CP 2.0—, foi o máis innovador, dirixido a un grupo con comorbilidade psiquiátrica, un fenómeno moi prevalente que representa unha das principais causas de discapacidade a nivel mundial segundo o que se reflicte en varios estudos epidemiolóxicos. Estes demostraron que a maioría das persoas diagnosticadas cun trastorno mental presentan ao longo da súa vida, polo menos, outro trastorno psiquiátrico coexistente.
Este novo enfoque proposto tiña como obxectivo que 10 usuarios do centro de Patoloxía Dual de Castro Riberas de Lea realizasen un programa de fisioterapia cun exergame temático de boxeo e danza, baseado en mellorar a súa motivación cara á práctica do exercicio físico e observar os efectos, tanto na súa calidade de vida como nas variables físicas, cognitivas e funcionais. Os resultados están agora na fase de análise e esperan ser reflectidos en artigos científicos en revistas de impacto.
Referentes nas terapias baseadas en exergames
As terapias de exercicio non se usan con asiduidade nesta poboación e, se falamos de programas virtuais —como é o caso—, non hai constancia na evidencia científica existente, como explicou un dos investigadores do proxecto, o Dr. Pablo Campo Prieto: “Ata onde sabemos, esta intervención realizada durante 12 semanas podería ser a primeira do seu tipo”. Ámbalas dúas aplicacións foron totalmente seguras (sen efectos adversos), divertidas para os participantes e lograron unha grande adhesión ao programa, con altos niveis de satisfacción, segundo os terapeutas encargados da supervisión dos estudos.
O Grupo HealthyFit continúa xerando evidencias científicas neste campo e está a contribuír cun sólido corpo de coñecemento no uso destas tecnoloxías que empregan programas terapéuticos de exercicio co apoio dos exergames (videoxogos activos) e están dirixidos a diferentes grupos: persoas maiores institucionalizadas, párkinson, alzhéimer, esclerose múltiple, síndrome de Down, enfermidades reumáticas ou danos cerebrais adquiridos, entre outros.
“A diversión motiva e motivar consegue unha alta adhesión aos programas. Os beneficios do exercicio baséanse na súa práctica habitual, polo que estes dispositivos poderían garantir un bo nivel de cumprimento”, conclúen os investigadores.
