A Garda Civil anunciou que investiga a un veciño de Cangas por comercializar a través de internet un composto tóxico semellante á lixivia, coñecido co acrónimo de MMS (Solución Mineral Milagrosa), que se ofrece como remedio a todo tipo de enfermidades, como o cancro, a sida, a tuberculose, a malaria ou a gripe. Ao ser o MMS un produto prohibido desde 2010 pola Agencia Española de Medicamentos, as autoridades acusan a este home dun presunto delito contra a saúde pública polo potencial risco contra a saúde.
Porén, na mesma páxina estaban tamén á venda os dous compostos químicos do MMS: clorito de sodio e ácido clorhídrico, ademais do produto xa mesturado, un tipo de lixivia que comercializaba co nome de Depur.
“Curacións extraordinarias”
O entramado completábase con outra web, vinculada á anterior, e tamén relacionada co mesmo individuo, na que se achega información sobre os supostos beneficios do MMS, con afirmacións temerarias e ligazóns a vídeos con testemuños de curación sen ningún tipo de evidencia científica.
Na súa web, o agora investigado recollía afirmacións de todo tipo: “Hoxe en día son miles de persoas en todo o mundo que xa coñecen e usan o MMS para mellorar a súa saúde, conseguindo en moitos casos curacións extraordinarias, incluso en casos considerados incurables”.
Sobre a suposta toxicididade do produto, a web esténdese en argumentacións sen o mínimo sustento científico, como as que se poden ler baixo estas liñas:
Unha vez recollida a información, os investigadores da Garda Civil inspeccionaron a sede social da empresa en Cangas, onde atoparon preto de 100 litros dos diversos compostos químicos que conforman o MMS e numerosos envases do produto xa mesturado, que se vendía co nome de Depur.
A operación rematou coa investigación penal do administrador único da empresa, como suposto autor dun delito contra a saúde pública.
O caso coñécese nos mesmos días nos que se soubo que a Consellería de Salut da Generalitat de Catalunya vai multar ao empresario Josep Pàmies con 120.000 euros por promocionar o MMS nas súas charlas e nas redes sociais. Nos meses pasados, Pàmies acudiu a Galicia a vender os produto que a súa propia empresa comercializa. As protestas cidadás fixeron que tanto a UDC como o colexio Hogar de Vigo denegaran a cesión dos seus espazos para celebrar estes eventos.
