Mércores 22 Maio 2024

Biofabri, peza clave desde O Porriño na vacina contra a Covid-19 do CSIC

A biotecnolóxica do grupo Zendal está fabricando xa os lotes que se usarán nos ensaios clínicos, despois de acadar unha eficacia do 100% en ratos

A carreira pola vacina contra a Covid-19 foi, en primeiro termo, un sprint, das grandes multinacionais e os grupos de investigación con maior capacidade económica no mundo para obter canto antes o antídoto. Pero tamén será unha carreira de fondo, na que dispoñer de diversas fórmulas achegadas por diferentes laboratorios e institucións aumentará as posibilidades de responder ao desafío que aínda queda por diante na pandemia. Neste sentido, o Centro Nacional de Biotecnoloxía do CSIC anunciou este xoves que o candidato vacinal MVA-CoV-2-S, acadou unha eficacia do 100% de protección contra o coronavirus en ratos, segundo expoñen nun artigo publicado en Journal of Virology.

O proxecto, dirixido polos virólogos Mariano Esteban e Juan García Arriaza, usa como vehículo o virus vaccinia modificado de Ankara (MVA) para transportar a proteína S do SARS-CoV-2 que estimule a defensa inmunitaria contra o coronavirus. Este avance serve para dar o seguinte paso e comezar as probas clínicas, nas que colaborará a empresa Biofabri, do grupo Zendal, con base no Porriño. A biotecnolóxica está xa a fabricar os lotes GMP (Good Manufacturing Procedures, polas súas siglas en inglés) que serán usados nas probas clínicas, e xa ten definido o proceso industrial para a fabricación de lotes comerciais tan pronto como a fase de desenvolvemento clínico conclúa. Biofabri tamén colabora con outra das vacinas avanzadas contra a Covid-19, a de Novavax, agora mesmo na fase III de ensaios clínicos, e cuxo antíxeno se fabricará na mesma planta.

Publicidade

O seguinte paso que dará o proxecto impulsado polo CSIC é a solicitude do permiso á Axencia Española do Medicamento para os primeiros ensaios clínicos, fases I/II, que poderían iniciarse nunhas semanas.

“Observamos que o candidato vacinal MVA-CoV-2-S xera unha resposta inmunitaria robusta con produción de anticorpos neutralizantes e activación de linfocitos T en ratos”, explica Mariano Esteban, que dirixe o laboratorio de poxvirus e vacinas do Centro Nacional de Biotecnoloxía (CNB-CSIC), e doutor en Microbioloxía pola Universidade de Santiago de Compostela.

Instalacións da empresa Biofabri, do grupo Zendal, no Porriño.
Instalacións da empresa Biofabri, do grupo Zendal, no Porriño.

“Describimos que a vacina confire unha protección do 100% contra o SARS-CoV-2 nun modelo de rato humanizado susceptible á infección por SARS-CoV-2, o cal é moi importante”, subliña Juan García Arriaza, investigador do grupo.

Neste caso, o virus MVA foi modificado para expresar a proteína S completa do SARS- CoV-2, que é a chave que permite a entrada do coronavirus nas células humanas. Incorporada no vehículo MVA, esta proteína prodúcese tan pronto como o virus penetra na célula e é a que ensina ao sistema inmunitario como debe recoñecer ao coronavirus real e como debe eliminalo.

O relevante da investigación, segundo destaca o CSIC, é que a vacina produce altos niveis de anticorpos IgG específicos fronte á proteína S do coronavirus e ao seu dominio de unión coa proteína ACE2 que serve de receptor das células humanas. Ademais, as mostras serolóxicas dos ratos vacinados neutralizaron de forma moi potente ao SARS- CoV-2 en cultivos celulares.

O estudo demostrou que a administración dunha ou dúas doses deste candidato vacinal protexe ao 100% dos ratos humanizados da enfermidade e letalidade causada polo SARS- CoV-2. Con dúas doses da vacina prodúcese unha inhibición completa da replicación do virus nos pulmóns. “Estes resultados demostran que a vacina para a Covid-19 baseada no vector MVA produce unha inmunoxenicidade robusta e unha eficacia completa en modelos animais, e apoian a súa futura aplicación en ensaios clínicos”, indican os científicos.

Os investigadores mostran ademais no estudo que a vacinación combinada con dúas vacinas diferentes, unha en primeira dose baseada en ácido nucleico (ADN-S) e outra en segunda dose (MVA-CoV2-S), produce niveis máis altos de activación de linfocitos T que a administración de dúas dose de MVA-CoV-2-S, o que ten relevancia cando se pretende incrementar a poboación de linfocitos T para conseguir respostas inmunes máis amplas e duradeiras.

Para definir un maior espectro de acción da vacina e cumprir cos requisitos das axencias reguladoras para os ensaios clínicos, están a levarse a cabo experimentos de inmunogenicidad e eficacia no modelo de hámster e proximamente efectuaranse tamén con macacos. Se todo vai segundo o previsto, poderíanse iniciar as fases clínicas I/II nunhas semanas e avanzar posteriormente cara á fase clínica III.


Referencia: COVID-19 vaccine candidates based on modified vaccinia virus Ankara expressing the SARS-CoV-2 spike induce robust T- and B-cell immune responses and full efficacy in mice (Publicado en Journal of Virology).

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Descuberto un planeta xigante tan lixeiro como o algodón de azucre

O novo astro é un 50% máis grande que Xúpiter, pero con unha densidade aproximada á décima parte da do xigante gasoso

A fronteira con Portugal é a área de Galicia con maior presenza do mosquito da malaria

O insecto leva anos na comunidade pero o parasito non está en circulación, polo que o risco de transmisión autóctona é baixo

Un equipo logra producir serotonina a partir dun fermento do viño

O grupo de investigación elaborou a chamada 'hormona da felicidade' de forma máis barata e ecolóxica a partir dunha cepa vínica

A reconquista da oliveira galega: “As súas características botánicas fana única no mundo”

Este venres presentouse o ‘Grupo Operativo’ do CSIC que traballa na recuperación do oliveiral tras séculos abandonado na comunidade