A vacinación dos nenos de 5 a 11 anos comezará a vindeira semana

A Comisión de Saúde Pública dá luz verde a esta medida despois de que a EMA autorizara en novembro o uso da inxección de Pfizer en menores de 12 anos

A Comisión de Saúde Pública acaba de incorporar o grupo de nenos de entre 5 e 11 anos á Estratexia Nacional de Vacinación contra a Covid-19. Esta decisión apróbase despois de que a Axencia Europea do Medicamento (EMA) autorizase a finais de novembro a vacina de Pfizer para estas idades. Ademais, nestes momentos, cun notable empeoramento da situación epidemiolóxica en todo o país, este grupo de idade é o que rexistra unha maior incidencia acumulada de casos de coronavirus.

A chegada da primeira remesa de vacinas pediátricas a España está prevista para o próximo 13 de decembro, polo que a Comisión de Saúde Pública prevé comezar a vacinación infantil nesta franxa de idade a partir do 15 de decembro. Dende o Ministerio de Sanidade informan que o reparto dos soros, “como se fixo en toda a campaña de vacinación”, farase de maneira proporcional á súa poboación diana.

Publicidade

https://twitter.com/sanidadgob/status/1468179976239390723

Amais disto, decidiuse que o intervalo de administración da segunda dose sexa de oito semanas para contribuír a incrementar a resposta inmune, así como para ter vacinados a todos os menores de 5 a 11 anos nun curto espazo de tempo con, polo menos, unha dose. O obxectivo de levar a cabo a vacinación infantil é diminuír a carga de enfermidade para este colectivo, así como a transmisión na contorna familiar, nos centros educativos e na comunidade.

A situación en Galicia

En relación á estratexia de vacinación que se levará a cabo en Galicia, o conselleiro de Sanidade, Julio García Comesaña, pronunciouse hoxe nun acto celebrado en Vigo. Ao parecer, esperan que o martes 14 cheguen a Galicia unhas 60.000 doses de Pfizer para comezar a inocular aos rapaces de entre 5 e 11 anos. Está previsto que as inxeccións se leven a cabo en grandes recintos.

De todos xeitos, hai arredor de 150.000 rapaces galegos desas idades, polo que faltarían 90.000 doses. Ao parecer, os soros que faltan chegarán a Galicia a partir de xaneiro, o que impediría inmunizar á meirande parte desta franxa poboacional antes de que remate o ano. En relación á estratexia de vacinación, Comesaña avanzou que, polo de pronto, priorizarase a aqueles menores que presenten patoloxías e logo chamaranse por idades, sendo os maiores os que primeiro deban acudir á cita.

1 comentario

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

A loita contra a resistencia antimicrobiana: “As vacinas reducen o uso de antibióticos”

Un informe advirte que a farmacorresistencia causa máis de 1,3 millóns de mortes a nivel mundial, cifra que podería chegar a 10 millóns para 2050

Arranca un ensaio clínico para avaliar a vacina combinada fronte á gripe e a covid en maiores de 65

O proxecto chámase Combogal e agárdase que participen nel 110.000 persoas entre a campaña que xa está en marcha e a da tempada 2027 - 2028

Vacinas nasais: unha nova e prometedora vía para frear a transmisión dos virus respiratorios

A modalidade xera unha defensa intensa nas vías respiratorias superiores ao administrarse o aerosol ou as gotas directamente sobre a mucosa do nariz

Entre a volta ás aulas e o descenso da vacinación en Europa: cales son as vacinas necesarias na infancia?

O calendario infantil marca que os bebés recibirán a maior parte das súas doses durante o seu primeiro ano de vida