Unha ponte pasada por auga. A borrasca Barra, situada preto de Irlanda, deixa un día marcado polas chuvias e o vento forte do suroeste. En terra, os raios de sol xa se comezarán a ver a media tarde, cando a fronte calme os seus efectos, aínda que o temporal seguirá manténdose no mar. De feito, para o mércores 8 e o xoves 9 de decembro está previsto que deixe en alerta laranxa a todo o litoral galego. É máis, mañá espéranse ondas que acaden os seis metros en toda a costa e que, incluso, cheguen aos oito metros no litoral da Coruña. A borrasca Barra tamén deixará neve nas montañas galegas.
https://twitter.com/MeteoGalicia/status/1468239211480367116
Máis polo miúdo, a Axencia Galega de Emerxencias (Axega) informou esta mañá do nivel de alerta laranxa en toda a costa de Galicia durante os próximos dous días. Segundo informaron dende o organismo, o temporal costeiro comezará no litoral da Coruña e Lugo a partir das 21.00 horas de hoxe, 7 de decembro. A zona de Pontevedra esperará ata a madrugada, cando está previsto que a borrasca azoute con máis forza o litoral das Rías Baixas.
Mellora a situación en terra
En terra, e segundo as previsións de Meteogalicia, o temporal Barra xa perde intensidade e Galicia quedará mañá, 8 de decembro, na zona de chuvascos. O ceo estará cuberto, na súa maioría, con precipitacións xeneralizadas de carácter intermitente, localmente fortes e que, de maneira ocasional, poderán vir acompañadas de sarabia. A cota de neve situarase entre os 900 e os 1.100 metros e as temperaturas descenderán. Os ventos sguirán soprando de compoñente oeste, con intervalos moi fortes no litoral norte.
O xoves 9, os restos do temporal Barra continuarán no litoral galego, que permanecerá en alerta laranxa. Non obstante, unha fronte cálida afectará a Galicia dende a primeira hora da mañá, deixando ceos cubertos e chuvias febles. Pola noite rexistraranse choivas máis intensas e as temperaturas ascenderán, mentres os ventos soprarán de compoñente oeste con intervalos fortes ao longo do día no litoral e nas zonas altas do interior.
