Únete á nosa canle de Whatsapp
Un equipo do Instituto de Biotecnoloxía de Pequín e da firma chinesa Cansino Biologics anunciou resultados prometedores na fase 1 da súa vacina con 108 adultos sans, tras 28 días de ensaios. Segundo os autores, a nova vacina é segura, ben tolerada e capaz de xerar anticorpos contra o SARS-CoV-2 en humanos. Os resultados finais serán avaliados en seis meses.
A carreira para lograr unha vacina contra a COVID-19 continúa a ritmo frenético. Agora é o proxecto chinés o que publicou en The lancet un estudo no que afirma lograr resultados prometedores en fase 1 con 108 adultos sans, tras 28 días de ensaios.
O anuncio dos investigadores chineses súmase aos realizados a semana pasada pola firma biotecnolóxica estadounidense Moderna que dixo obter datos provisionais positivos na fase 1 da súa vacina contra o coronavirus. Pola súa banda, a Universidade de Oxford informou de que a súa vacina avanzaba cara ás fases 2 e 3 e que a ía a probar en máis de 10.000 persoas incluíndo nenos e maiores de 70 anos.
Segundo sinala Wei Chen, primeira autora e líder do estudo, “estes resultados representan un fito importante. O ensaio demostra que unha soa dose da nova vacina Covid-19 vectorizada por adenovirus tipo 5 [Ad5-nCoV] produce anticorpos específicos contra o virus e células T en 14 días, o que a converte nunha posible candidata para ulteriores investigacións”.
A primeira vacina experimental contra a Covid-19 xera inmunidade
Con todo, a epidemióloga engade que “estes resultados deben interpretarse con cautela, xa que os desafíos no desenvolvemento dunha vacina Covid-19 non teñen precedentes, e a capacidade de desencadear esta resposta inmunitaria non indica necesariamente que vaia a protexer fronte ao coronavirus. Aínda estamos moi lonxe de que esta vacina estea dispoñible para todos”.
A nova vacina contra a Covid-19 vectorizada por Ad5 avaliada neste ensaio utiliza un virus do arrefriado común debilitado -adenovirus, que infecta doadamente ás células humanas pero é incapaz de causar enfermidades– para introducir nas células o material xenético que codifica as proteínas en forma de espícula coas que o SARS- CoV-2 entra nas células. Estas células producen despois a proteína de espícula e viaxan aos ganglios linfáticos, onde o sistema inmunintario crea anticorpos que recoñecen esa proteína e combaten o coronavirus.
No ensaio avaliouse a seguridade e a capacidade de xerar unha resposta inmunitaria de diferentes doses da nova vacina Ad5-nCoV en 108 adultos sans de entre 18 e 60 anos de idade que non estaban infectados polo SARS- CoV-2.
A creación dunha vacina eficaz considérase a solución a longo prazo para controlar a pandemia de COVID-19. Actualmente, hai máis de 100 vacinas candidatas para COVID-19 en desenvolvemento en todo o mundo.
Aquí podes ler o estudo publicado en The Lancet
