A ondada de vandalismo no patrimonio galego non cesa. A última agresión contra a contorna histórica e cultural tivo lugar na Catedral de Santiago, concretamente na fachada da Porta Santa. A pasada tarde do domingo, un individuo gabou polo edificio axudándose das esculturas declaradas Patrimonio Mundial da Unesco. Rapidamente, os transeúntes tomaron imaxes e vídeos do que estaban a ver: os ‘Vintecatro’ estaban sendo pisados e manipulados por unha persoa que pretendía escalar as esculturas procedentes do coro pétreo do Maestro Mateo, correndo un grave perigo de ser danadas.
“Novo atentado”, alega a Asociación para a defensa do Patrimonio Galego no seu Twitter. “Isto váisenos das mans”. Miguel Ángel Cajigal, historiador e divulgador da arte (coñécese como El Barroquista), explica que “As culturas que pisa proceden do coro medieval da catedral, coñecido como Coro do Maestro Mateo, e foron insertadas na Porta Santa durante a reforma barroca do peche da cabeceira”.
Este grupo está composto por profetas, apóstoles e outras personaxes bíblicas que integraban orixinalmente o programa iconográfico desenvolto nas fachadas do coro. A Porta Santa atópase situada na parte traseira da Catedral. Ábrese só os anos santos,e é unha das partes máis simbólicas e que máis interese esperta nos miles de turistas que cada ano visitan a capital. É de dúas follas nas que se representan pasaxes da translación, vida e morte do Apóstolo Santiago.
Aumentar a vixilancia
Nos últimos días, a alcaldesa de Santiago, Goretti Sanmartín, anunciou que aumentaría a vixilancia policial na cidade para evitar este tipo de condutas. Foi despois de que se atoparan pintadas con xices de cores na igrexa de San Martiño Pinario co lema de Ferrol mola. Non é a primeira vez que alguén rube a Catedral de Santiago. No mes de marzo, uns rapaces nunha noite de festa, subiron polo enreixado recemente restaurado, grávarono e compartírono en redes sociais. Por suposto, fíxose viral e, da mesma maneira que o vídeo da Porta Santa, recibiu numerosas críticas.
