Un equipo de Sputnik Labrego e do Instituto de Ciencias do Patrimonio (Incipit) do CSIC acaban de descubrir unha nova estación de pinturas pehistóricas rupestres na parroquia de Casaio, no concello ourensán de Carballeda de Valdeorras. Os arqueólogos estaban a realizar traballos na zona cando un veciño lles contou que podía haber pinturas no lugar de Colobredos. Despois da comprobación experta e de confirmar a veracidade do achado, o equipo contactou coa Dirección Xeral de Patrimonio Cultural para dar conta do descubrimento.
“Esta nova estación de pinturas prehistóricas é un importante achado por moitas razóns. A primeira é que pensabamos que todas as pinturas se concentraban nun só punto, o de Pala de Cabras. Agora sabemos que non é así e que ten que haber máis aínda por descubrir”, apunta o director do proxecto, Carlos Tejerizo. O novo conxunto de pinturas está composto por, ao menos, tres formas de soles e unha posible silueta humana. “Estes motivos engaden moita información ao xa coñecido anteriormente na Pala de Cabras, xa que non tiñamos atopado formas humanas, moi comúns nas estacións de pintura rupestre deste período”, continúa.
Pala de Cabras
“A tipoloxía dos soles, moi distintos aos de Pala de Cabras, poderían indicar unha cronoloxía distinta, quizais da Idade do Bronce”, apunta. Aproveitando a presenza do equipo do Incipit, dirixido por Lucía Pereira Pardo, experta en documentación e análise de patrimonio, faranse os primeiros estudos destas novas pinturas prehistóricas para comprobar a súa composición química e poder comparalas coas coñecidas en Pala de Cabras.
Este descubrimento abre novas perspectivas sobre o patrimonio prehistórico de Galicia, complementando a información sobre a arte rupestre e a súa difusión durante a prehistoria. “Agora toca seguir traballando e, para iso, precisamos de apoios e financiamento. Pensamos que este é un patrimonio único que temos o deber de protexer”, remata Tejerizo.
