Os traballos de restauración do convento pontevedrés de Santa Clara veñen de acadar un novo fito cun descubrimento “único”. Trátase duns murais datados no século XVI que supoñen o “único caso en Galicia con pinturas nun refrectorio”.
Son palabras de José Manuel García Iglesias, profesor emérito da Universidade de Santiago e considerado unha das máximas autoridades de Galicia e de España en pinturas murais. Para o catedrático, o achado en Santa Clara é algo que non ten parangón, tanto polo contexto na que foron creadas como polo lugar escollido para un debuxo que contén unha representación totalmente nova para García Iglesias.
A imaxe dun corazón inscrito nunha aguia é unha imaxe que o experto soamente viu no convento pontevedrés que se atopa en fase de restauración e musealización por parte da Deputación de Pontevedra. “Creo que non a hai en ningún outro lugar”, sentenciou o catedrático na presentación do descubrimento, onde estivo acompañado polo vicepresidente do goberno provincial pontevedrés, Rafa Domínguez.
A imaxe remite ao segundo tomo dun incunable de finais do século XV publicado en Basilea (Suíza) no que se recollían as os sermóns de San Agustín e do que en España se conserva un exemplar no arquivo da catedral de Segovia. Así mesmo, tamén aparece un Cristo entre estrelas, unha imaxe de Santa Clara e outro conxunto de temática vexetal no que, segundo o profesor, podería estar representado San Franscisco.
Chegaron a hoxe por estar tapadas
A clave na súa conservación ata o día de hoxe para que poidan ser contempladas é sinxela. Estiveron tapadas pola cal ca que, de forma xeneralizada, se branquearon as paredes a partir do século XVI para facer fronte ás pestes. Isto supuxo a fin da historia mural, que contaba ata entón cunha tradición moi importante desde o prerrománico ata o século XVI.
No caso de Santa Clara, García Iglesias sitúa a súa creación entre os anos 1570 e 1580. Constan de dúas capas, unha máis antiga e pequena e outra máis ampla e recente. “No momento de retirar a cal ou o retablo, as pinturas envellecen e en 20 ou 30 anos escurécense, polo que hai que traballar sobre elas continuamente”, sinalou o catedrático de Historia, que felicitou á Deputación de Pontevedra pola súa “sensibilidade” e “vontade de traballar” para que os murais se conserven.
“Imos manter e conservar estas pinturas murais para que as persoas que visiten o novo edificio de Santa Clara gocen destas obras de arte que queremos que sexan visitables”, sinalou, pola súa banda, o número dous da Deputación de Pontevedra, que destacou que o proceso de rehabilitación do mosteiro clarista “avanza sen descanso” malia que “non sempre se vexa” o traballo que se está a facer.
