A Asociación Española Contra o Cancro (AECC) da Coruña concedeu as súas Axudas á Investigación a varios proxectos do Instituto de Investigación Sanitaria de Santiago (IDIS) co obxectivo de fomentar o estudo oncolóxico. A axuda de maior contía, cifrada en 450.000 euros, vai destinada á compañía biotecnolóxica Diversa Techonologies, que naceu como spin-off do IDIS e do Sergas e está dirixida pola científica María de la Fuente. O financiamento recibido irá destinado a avanzar no desenvolvemento dunha nanoinmunoterapia de precisión para o cancro gástrico, de cara a ofrecer unha atención máis humana e personalizada.
Ashwin Woodhoo, investigador líder do grupo de Control de Regulación Xénica en Enfermidades (GeneRegulon) foi galardoado coa axuda a Proxectos Xerais AECC 2025, dotada con 400.000 euros durante catro anos. O seu traballo céntrase en atopar novas vías terapéuticas para tratar os tumores malignos da vaina nerviosa periférica, un cancro pouco común e especialmente agresivo que xorde nos nervios.
Pola súa banda, Pablo Aguiar, investigador líder do grupo de Imaxe Molecular, foi o beneficiario da Axuda a Proxectos Estratéxicos 2025, dotada con 140.703 euros para tres anos. A súa proposta, AI.PET-PT integra a imaxe molecular con técnicas de intelixencia artificial para avanzar na personalización da protonterapia coa fin de deseñar tratamentos máis axustados.
A investigadora Lucía Sanjurjo, recibiu a axuda Sinerxias 2025 por valor de 20.000 euros polo seu proxecto NANO-BIT que explora o uso de nanotecnoloxía para crear nanocápsulas capaces de transportar anticorpos directamente ao interior das células tumorais. O investigador Jorge Barbazán, do grupo de Oncoloxía Médica Traslacional (Oncomet) do IDIS, recibiu a mesma axuda polo seu estudo no efecto de novas estratexias terapéuticas baseadas en radioterapia no cancro de páncreas.
A Axuda Clínico Júnior, dotada con 154.000 euros, foi entregada a Alberto Rojas para deseñar un modelo de intelixencia artificial que mellore o diagnóstico de determinados cancros do sangue.
O acto de entrega celebrouse no marco do IV Punto de Encontro Voluntariado e Investigación no Palacio de Exposicións e Congresos da Coruña (Palexco). O encontro contou coa participación do conselleiro de Sanidade, Antonio Gómez Caamaño; o reitor da Universidade da Coruña, Ricardo Cao; e a delegada especial en materia de Educación e Mocidade da Deputación da Coruña, Yoya Neira.
