O 2 de setembro, os transatlánticos Star Legend, Iona e Liberty of the Seas atracaron na Estación Marítima de Vigo con 14.000 turistas a bordo que enchen o centro da cidade. As previsións apuntan a que, este ano, no porto de Vigo se superarán as 125 escalas e os 306.000 pasaxeiros, desbordando o dato récord do último ano de 250.000 pasaxeiros e arredor de 100 escalas. A Plataforma fronte á masificación turística Vigo – O Morrazo, composta por unha veintena de organizacións sociais, ecoloxistas, veciñais e sindicais, denuncia que a contaminación que carrexan tres megacruceiros é igual a que Vigo sexa invadido por 18 millóns de coches.
Trátase dun turismo de altas emisións contaminantes (SOx, NOx e partículas ultrafinas) e unha actividade extractivista polo uso intensivo de recursos naturais como a auga e unha explotación industrial que causa enormes impactos sobre as poboacións destinatarias, así como aos ecosistemas litorais e mariño, con frecuentes alcances a cetáceos. Igualmente, sinalan que o desembarco de 10.000 persoas no centro da cidade supón o colapso de rúas e prazas, a dificultade para que a veciñanza se mova por estas zonas, e o reducido e concentrado impacto económico que ten, principalmente en determinados locais de hostalería e tendas de souvenirs.
Á situación súmase que o peirao de trasantlánticos atópase nunha área que, está previsto, sexa incluída nunha Zona de Baixas Emisións en cumprimento da Lei de Cambio Climático, polo que esta actividade altamente emisora é incompatible con esta declaración. Así, sería unha zona de control de emisións tanto de óxidos de xofre, de nitróxeno e partículas.
