Cunha magnitude aparente -3,9, un brillo comparable ao de Venus, poderase ver hoxe sobre o ceo de Galicia o paso da Estación Espacial Internacional (ISS). Tal e como informou unha vez máis o tuiteiro italiano Ignazio Magnani, e se pode comprobar en numerosas webs de información astronómica, a ISS percorrerá durante sete minutos, pouco antes da medianoite, a Terra por riba das nosas cabezas.
🇪🇸 ¡Galicia!
La Estación Espacial Internacional se podrá ver hoy a simple vista (si las nubes lo permiten) en todas partes a las 23:52 hrs.Consejo: ⏰
pon la alarma👩🚀 Tripulación 60 https://t.co/fI01cZcyfB
📰 @Vigoalminuto yo >https://t.co/AvRlduSsQp pic.twitter.com/C0dx6KLrTg— Ignazio Magnani (@IgnazioMagnani) 17 de xullo de 2019
É un novo paso para ver en boas condicións, despois de que onte xa puidera contemplarse ao pasar a 400 quilómetros de altura e unha velocidade de 28.000 quilómetros por hora. Porén, estaba situada máis ao norte, polo que a visibilidade era algo menor.
Como ver o paso
O paso deste mércores é especialmente significativo xa que o punto máis alto que acadará a ISS sobre o ceo de Galicia é de 87º, practicamente polo cénit nese momento. Nos vindeiros días haberá máis opcións semellantes, pero a horas menos apetecibles: na madrugada deste sábado 20 de xullo pasará sobre as 4.35 da mañá.
Así, é recomendable que pouco antes das 23.49 horas esteamos situados nun punto elevado, afastado da contaminación luminosa na medida do posible. E temos que mirar cara ao suroeste. Se nos fixamos, veremos como aparece un punto brillante que se dirixe cara a vertical do ceo. A Estación seguirá o seu paso cara ao noreste para desaparecer pouco despois das 23.56 horas.
Neste momento, a bordo da Estación Espacial están os astronautas estadounidenses Christina Koch e Nick Hague e o ruso Alexey Ovchinin. Precisamente o día 20, no que se cumpren 50 anos da chegada do Apolo 11 á Lúa, sairán desde a Terra os tres novos membros da tripulación, Drew Morgan (Estados Unidos), Alexander Skvortsov (Rusia) e Luca Parmitano (Italia).
