Un equipo do Instituto de Investigación Sanitaria de Santiago (IDIS) pon a disposición de investigadores, empresas e persoas interesadas unha plataforma para a detección de biomarcadores. O sistema é único en Galicia e no noroeste peninsular, e un dos poucos que hai en España. Actualmente pódese acceder a través da páxina web do IDIS, onde hai información sobre a tecnoloxía base da plataforma, Single Molecule Array (SIMOA), así como os prezos, servizos e a forma de acceder a eles.
O xefe de Neuroloxía do CHUS, José María Prieto, é o líder do grupo de INvestigación Traslacional en Enfermidades Neurolóxicas do IDIS que está detrás desta iniciativa. A plataforma, que naceu en 2023, utiliza un sistema automatizado para a detección de biomarcadores en diversos tipos de mostras biolóxicas como plasma, soro e ouriños, entre outras. Faino a través dunha avanzada tecnoloxía de inmunodetección. Segundo explican dende o IDIS, a plataforma facilita a identificación precisa de concentracións mínimas de biomarcadores, a procura de novos marcadores e o desenvolvemento de ensaios innovadores para a súa aplicación na práctica clínica diaria.
Equipo tecnolóxico e humano
O equipo SIMOA atópase nunha sala con control de temperatura, que está equipada con conxeladores (-80 ºC e -20 ºC) e neveiras (4 ºC) para garantir o adecuado almacenamento de mostras e reactivos dos kits de análises. Ademais, conta cun equipo humano especializado e ofrece servizos analíticos e validación de ensaios para diversas patoloxías e biofluídos. Dende o equipo de Prieto ofrecen apoio no deseño e execución de probas diagnósticas de biomarcadores utilizando a técnica Single Molecule Array (SIMOA) en diversos tipos de fluídos biolóxicos, co fin de xerar coñecemento que poida ser publicado ou patentado.
Hai uns meses publicouse o primeiro estudo en España que medía os niveis periféricos de neurofilamento lixeiro en pacientes con depresión, empregando a tecnoloxía SIMOA. Con esta nova plataforma, o grupo pretende dar servizo á demanda do IDIS, doutros centros de investigación e, mesmo, das empresas.
