Catro profesionais do Instituto de Investigación Sanitaria de Santiago de Compostela (IDIS) destacan entre os postos 74 e 169 dun listado de 5.000 científicos na edición 2022 do Ranking de Persoal científico español, de acordo ao seus perfís no Google Scholar, onde se recoñece o seu gran número de citacións e publicacións.
Felipe Casanueva, Carlos Diéguez, María José Alonso e Ángel Carracedo son os nomes dos protagonistas. O proceso polo cal foron seleccionados parte da recollida dos datos ao longo da última semana de decembro de 2021 e logo, Google, publica na edición de 2022 o ranking no que se clasifica ás personas segundo o índice de publicacións científicas con máis repercusión.
Felipe Casanueva
Destes catro, o que se sitúa no primeiro posto é Felipe Casanueva é o número 74 desta listaxe global, cun índice de citacións de 118 e un total de 57.561. O investigador dirixiu 48 tese doutorais que recibiron a máxima cualificación e é Doutor Honoris Causa por tres universidades. Ao longo da súa traxectoria recibiu diversos premios como o Rey Jaime I de Investigación Médica e o Geoffrey Harris da Sociedade Europea de Endocrinoloxía. Na actualidade é investigador do IDIS, profesor emérito da Universidade de Santiago de Compostela (USC), vicepresidente do Padroado de Dieta Atlántica, editor xefe da revista de Springer, Reviews in Endocrinology and Metabolism’ e forma parte do comité executivo da Pituitary Society.
O Centro Superior de Investigacións Científicas (CSIC) tamén lle sitúa no posto 74 entre as 5.000 persoas españolas investigadoras en todo o mundo en calquera disciplina.
Carlos Diéguez
O seguinte na lista é Carlos Diéguez. Situado no posto 84 e cun índice de citacións de 115 e 48.9985 publicacións, é o primeiro director científico do IDIS e, actualmente, investigador na área de Endocrinoloxía do Instituto, director do Centro de Investigación en Medicina Molecular e Enfermidades Crónicas (CIMUS) e director científico de CIBER Obesidade e Nutrición ademais de catedrático de Fisioloxía. Con anterioridade, tamén foi presidente da Sociedade Española de Endocrinoloxía e Nutrición (SEEN). A súa actividade investigadora vinculada ao campo da Endocrinoloxía e Nutrición reflíctese nos máis de 450 traballos publicados en revistas internacionais.
María José Alonso
No posto 168, cun índice de 96 e 32.280 citacións, sitúase María José Alonso, prestixiosa investigadora formada en centros internacionais e creadora dun grupo de investigación pioneiro en España no ámbito da nanomedicina e nos sistemas de liberación de fármacos e vacinas. A investigadora do IDIS dirixiu e coordinou máis de 60 proxectos de investigación, dos que xurdiron 22 patentes internacionais, 300 artigos científicos e dous libros. É directora da Xunta de Goberno da Controlled Release Society (CRS), a sociedade máis importante no seu campo.
A investigadora do IDIS forma parte de plataformas tecnolóxicas como a European Technology Platform on Nanomedicine, Nanofuture e a Plataforma Española de Nanomedicina, así como de diversas redes de colaboración. Tamén participa no comité editorial de 11 revistas científicas e recibiu premios como o Rey Jaime I, o Novoa Santos e o Maurice Maria Janot.
Ángel Carracedo
Ángel Carracedo é o investigador que ocupa o posto 169 da listaxe, cun índice de 93 e 40.178 citacións. O doutor Carracedo é o investigador principal da área de Xenética do IDIS e director da Fundación Galega de Medicina Xenómica e do Centro Nacional de Genotipado- ISCIII. Tamén foi o director do Instituto de Medicina Legal da USC e é membro do CIBERER.
Ao longo da súa traxectoria profesional publicou 12 libros e 550 artigos en revistas internacionais, ademais forma parte de sociedades nacionais e internacionais de Medicina Forense, Xenética, Farmacogenómica e Oncoloxía. Na actualidade coordina ao Grupo de Medicina Xenómica e destaca como un dos autores máis citados en Bioloxía Molecular cunha media que supera as 2.000 citacións anuais. Nos últimos exercicios, o investigador recibiu numerosos premios como a Medalla de Ouro e Prata de Galicia, o Premio Rey Jaime I de investigación, a Medalla Adelaide, a Medalla Galien, o Premio Nacional de Xenética, o premio Prismas de divulgación, o Premio Galicia de Investigación, o Premio Novoa Santos e a Medalla Castelao.
O Instituto de Investigación Sanitaria de Santiago de Compostela ( IDIS) nace en 2008 como froito da colaboración entre o Servizo Galego de Saúde e a USC. O seu obxectivo é identificar e desenvolver novas solucións que dean resposta aos problemas de saúde da sociedade.
Cun equipo de máis de 1000 investigadores, 99 grupos de investigación, 31 millóns de euros de fondos e 88 proxectos de investigación captados na última anualidade, o IDIS contribúe co seu labor para incrementar o coñecemento da saúde e á consolidación da innovación no sector sanitario.
