A porcentaxe de mulleres empregadas en ciencia e tecnoloxía de Galicia é maior que a media de España. Así o reflicte un mapa interactivo publicado polo Eurostat —o portal europeo de estatísticas e datos— no que se pode ver a proporción de científicas traballando en diferentes rexións. No caso do noroeste peninsular, que Galicia comparte con Asturias e Cantabria, a cifra é dun 52,3% asalariadas neste eido. Este dato supera a outras rexións como Cataluña e Valencia, cun 50,2% ou Andalucía e Murcia, cun 49,6%.
En Europa, dos 78,3 millóns de persoas empregadas en ciencia e tecnoloxía en 2023, o 52% eran mulleres, segundo datos do Eurostat. Cifra que non variou nos dous últimos anos. O mesmo informe explica que o seu traballo se desenvolve máis en actividades de servizo —cun 57% de mulleres— que en investigación ou desenvolvemento tecnolóxico en si —un 48%—. A cifra total de traballadores nestes eidos aumentou nos últimos 10 anos nun 25%, sendo en 2013 62,5 millóns.
Malta, á cola
Por rexións, as maiores proporcións de mulleres empregadas en ciencia e tecnoloxía atopámolas en Lituania e Letonia. Ambos os países albergan un 63% de traballadoras. Despois, varias áreas do leste de Alemaña, en concreto, Sajonia-Anhalt ten un 62%. Pola contra, en catro rexións de Italia rexístranse porcentaxes dun 46% e 47% e, na cola, Malta rexistra un 45%.
O informe do Eurostat tamén resalta que o subgrupo de científicos e enxeñeiros, aqueles que “se dedican a utilizar ou crear coñecementos científicos e principios de enxeñería e tecnoloxía”, aumentou nun 4,8% en comparación con 2022. Acorde aos seus datos, Alemaña empregou o maior número de traballadores destes eidos de todos os países da Unión Europea. Estímase que foron máis de 3,9 millóns de persoas entre 15 e 74 anos.
