A formación dunha depresión illada en niveis altos (coñecida como DANA, polas súas siglas en castelán) vai alterar o tempo en Galicia nestes primeiros días de setembro. Xa na tarde do martes se produciron treboadas no sur da provincia da Coruña e a confluencia das de Pontevedra e Ourense, así como nas montañas orientais. Porén, segundo avanzan MeteoGalicia e AEMET, o aviso de nivel amarelo por tormentas estenderase hoxe a todo o interior do país. Apenas se libran do aviso as comarcas costeiras, aínda que tampouco se descarta nelas a aparición de chuvascos tormentosos.
Segundo explican desde MeteoGalicia, a DANA, con aire frío en altura, chegará desde o Atlántico. Isto, sumado ás altas temperaturas en superficie, que hoxe se achegarán aos 30ºC en moitas zonas, xerarán unha situación de inestabilidade que se estenderá a partir de mediodía a todo o territorio galego e afectará tamén á meirande parte da península.
Bos días! Comezan a entrar os chuvascos polo sur e co avance do día serán probables en calquera punto de #Galicia
🚗Moita precaución, que son localmente fortes, veñen acompañados de tronadas e tamén con sarabia
📡Imaxes do radar cada 10 min: https://t.co/Iquz2YIzmk pic.twitter.com/jZEjmeriCN
— MeteoGalicia (@MeteoGalicia) September 1, 2021
Así, antes das 10 da mañá do mércores 1 de setembro xa se superaran os 15 litros por metro cadrado na estación de Viana do Bolo. As Na tarde do martes, as treboadas acompañadas de chuvia e, puntualmente, de sarabia, provocaron que caesen ata 29,4 litros en Amiudal (Avión), 26,4 en Ourense ou 21,8 en Cequeliños (Arbo).
Foi tamén destacable o número de raios detectados pola rede de MeteoGalicia. Máis de 1.600 se detectaron durante o martes, principalmente a partir das 14 horas.
Para o xoves 2 de setembro, MeteoGalicia mantén o aviso amarelo, aínda que localizado en todo o interior de lugo e o leste de Ourense.
