(en ampliación) – A Xunta de Galicia anunciou este luns as novas restricións para conter a terceira onda da Covid-19, e que afectarán a todo o territorio galego. Segundo destacou o presidente autonómico, Alberto Núñez Feijoo, as medidas entrarán en vigor na medianoite do martes 26 ao mércores 27 e rexerán, en principio, ata o martes 16 ao 17 de febreiro. “É o tempo mínimo que consideramos necesario”.
Estas son algunhas das decisións avanzadas na comparecencia de Feijoo, que se exporán nun decreto que se publicará no Diario Oficial de Galicia este martes:
- As interaccións sociais quedan limitadas a conviventes “sempre que sexa posible”.
- Peche perimetral de todos os concellos, agás por motivos xustificados.
- Peche total da hostalaría agás os pedidos para recoller e os servizos a domicilio.
- Peche de ximnasios e establecementos deportivos en interiores.
- Uso de máscara en todo momento, tamén para facer deporte na rúa.
- Mantense o confinamento nocturno entre as 22 e as 6 horas.
- O comezo das clases na universidade adíase o 8 de febreiro, e ata o 17 de febreiro serán telemáticas.
- Mantéñense as clases presenciais no resto de niveis de ensino.
- Peche do comercio non esencial ás 18 horas e do esencial ás 21.30 horas.
- Peche dos centros comerciais nas fins de semana.
- Facilitar o teletraballo.
A transmisión descontrolada do coronavirus avanza “momentos moi duros” en Galicia
A decisión tómase no día no que Galicia acada o máximo de hospitalizacións, mesmo por riba do cumio da primeira onda, con 1154 persoas ingresadas (993 en unidades de hospitalización e 161 nas UCIs). O incremento da transmisión constátase tamén no número de falecementos, que supera desde hai máis dunha semana a decena e ascende xa a 1622 persoas desde o comezo da pandemia.
