Foron case dúas semanas de tregua despois dun dos meses máis chuviosos dos últimos anos. Pero unha fronte fría que chegará nas vindeiras horas desde o Atlántico norte deixará de novo en Galicia un temporal de chuvia e vento que obrigou ao 112 a activar a alerta laranxa por choiva no interior da provincia de Pontevedra a partir do mediodía do xoves 12. Agárdase que caian acumulados de ata 50 litros, que poderían duplicarse ata a xornada do venres. Do mesmo xeito, o aviso de nivel laranxa esténdese a toda a costa galega por ondas de ata 7 metros e vento no mar moi intenso, de ata forza 8.
Con todo, a gran parte do oeste de Galicia terá avisos de nivel amarelo o xoves. MeteoGalicia advirte de precipitacións fortes durante a segunda metade do día. Na Mariña de Lugo haberá ademais un aviso por refachos que superarán os 80 km/h.
Bos días! nesta imaxe da canle infravermella do 🛰️Meteosat vemos a fronte fría que pasou esta noite por #Galicia e que xa se despraza polo centro da península, o aire frío e os chuvascos que nos quedan para hoxe e a borrasca que o xoves nos deixará un temporal de chuvia e vento. pic.twitter.com/0Ga84CHK7d
— MeteoGalicia (@MeteoGalicia) December 11, 2019
O venres seguirá chovendo, aínda que con menos intensidade, pero un corredor de isóbaras entre unha borrasca ao leste de Inglaterra e o anticiclón dos Azores, deixará ondas superiores aos 6 metros en toda a costa, polo que se volverá activar o nivel laranxa. Xa o sábado agárdase un empeoramento das condicións, cunha nova borrasca que se deixará notar no país.
A situación de baixas presións será notable en todo o norte peninsular, desde Galicia ata os Pireneos. Para o venres, a Aemet sitúa o nivel de aviso no máximo, o vermello, no Cantábrico oriental, con ondas de máis de nove metros de altura.
