Únete á nosa canle de Whatsapp
A partir do vindeiro martes, Rosalía de Castro podería chegar onde nunca pensou: a darlle nome unha estrela que está a 240 millóns de anos luz da Terra. A escritora galega, xunto a Breogán e unha ampla lista de candidatos, opta a ser a gañadora dunha votación cuxo resultado anunciará o 17 de decembro a Unión Astronómica Internacional (IAU), nunha rolda de prensa que terá lugar no Observatorio de París.
Así o anunciou a entidade, que este ano celebra o seu centenario. Para conmemorar o aniversario, entre outras moitas actividades, a IAU puxo en marcha a campaña Name Exo Worlds, cos que se bautizará a máis dun cento de sistemas de planetas extrasolares e as súas estrelas. Ademais de Rosalía e Breogán, a votación propoñía para cada unha delas os nomes de Río Sar e Ith para os planetas.
Na votación, a cada país correspondeulle unha parella: España tiña que elixir os nomes para a estrela amarela HD 149143 e o seu xigante gasoso HD 149143 b. No caso de Rosalía, a proposta foi da Agrupación Astronómica Coruñesa Ío que, xunto á Fundación Rosalía e outras entidades, que desenvolveron nas pasadas semanas unha campaña para conseguilo. No caso de Breogán e Ith, a idea foi dos investigadores da Universidad Autónoma de Madrid Asier Castrillo e Isabel Rebollido (orixinaria de Boiro).
Foi a Sociedade Española de Astronomía (SEA), coa colaboración do Planetario de Pamplona, a entidade encargada de poñer en marcha este concurso en España. Hai uns meses abriuse o prazo para propoñer os posibles nomes. Recibíronse unha vintena de propostas por parte de astrónomos afeccionados e profesionais e tamén de persoas do público en xeral, das que se seleccionaron doce que cumpren cos requisitos da IAU.
Alén de Rosalía, río Sar, Breogán e Ith, en España puido votarse tamén por Cuelebre e Xana, personaxes da mitoloxía asturiana; Culebra e Malpolon, xéneros de culebras; Elcano e Vitoria, referencias á primeira volta en barco á Terra; Xirasol e Pétalo, flores; Iberia e Millares, península ibérica e unha das súas antigas civilizacións; Isabel e Diego, os amantes de Teruel; Tajo e Jarama, ríos; Tirant e Carmesina, personaxes de Tirant lo Blanc; e Zamenis e Phion, personaxes da mitoloxía grega relacionados coas serpes (como a constelación Ofiuco onde está a estrela)
