Achéganse días de precipitacións persistentes en Galicia que poden xerar problemas nalgunhas partes do país. Despois dos intensos episodios de novembro e dun dos días máis chuviosos dos últimos anos na provincia da Coruña, que tivo lugar a mediados de xaneiro, a metade oeste da comunidade está en nivel de aviso amarelo ata o venres (con breves períodos de menos intensidade) por predicións que falan de máis de 100 litros por metro cadrado. Ante a situación, a Axencia Galega de Emerxencias activou o Plan Especial por Risco de Inundacións debido á agardada subida do caudal dos ríos da bacía de Galicia-Costa.
#Alertas112
Ante a suba dos caudais nas concas de Galicia-Costa, vén de activarse o Plan Especial por Risco de Inundacións de Galicia #INUNGAL. Polo que poden producirse inundacións eventuais e pequenos desbordamentos nas súas contornas. Así pois, siga estas recomendacións pic.twitter.com/BHVWWmkHVe— 112Galicia (@112Galicia) January 29, 2020
Con estas previsións, MeteoGalicia mantén distintos niveis de aviso. No litoral da Costa da Morte está activado o nivel laranxa por ondas de ata seis metros, mentres que o aviso é amarelo no resto da costa galega por ondas de catro metros. Do mesmo xeito, o vento no mar pode acadar a forza 8 con dirección suroeste.
Xa en terra, os refachos serán de máis de 80 km/h no norte das provincias da Coruña e Lugo, o que fixo activar tamén o nivel amarelo durante este mércores.
Porén, a situación máis complicada estará no referente ás precipitacións. Desde este mércores e ata o venres, o aviso é amarelo no oeste da Coruña e o interior de Pontevedra por precipitacións que poderían superar os 40 litros por metro cadrado en 12 horas.
Pero os datos xa están superando as previsións. Así, en apenas 12 horas do mércores xa se chegou aos 80 l/m2 en Cespón (Boiro) e tamén se superaron os 50 en Muralla (Lousame), Monte Castrove (Poio), Costa (Rois), Xesteiras (Cuntis) ou Mazaricos.
Bos días!! Hoxe chega a #Galicia un novo sistema frontal moi activo que nos deixa unha xornada de chuvias persistentes, especialmente ao oeste e suroeste da Coruña e no interior de Pontevedra, onde as acumulacións poden superar os 40 l/m2 en 12 horas.
⚠️https://t.co/795Ol1Dc28 pic.twitter.com/JWq7GY4Cgc— MeteoGalicia (@MeteoGalicia) January 29, 2020
Recomendacións ante inundacións
Como adoita acontecer nestes casos, desde o 112 recomendan como precaución fronte as inundacións abandonar as actividades que se estean realizando en espazos fluviais, retirar os vehículas das beiras dos ríos, evitar atravesar pontes ou torrentes e saír do vehículo e situarse nunha parte alta en caso de que as inundacións alcance os coches.
